O‘zbekistonda prezident saylovi - onlayn

MSK raisi Zayniddin Nizomxo‘jayevning so‘zlariga ko‘ra, chet ellarda ovoz bergan vatandoshlar soni haqida ertaga, 25-oktabr kuni ma’lumot beriladi.

O‘zbekiston Saylov kodeksining 96-moddasida, saylov, agar unda saylovchilarning kamida 33 foizi ishtirok etgan bo‘lsa, haqiqiy deb hisoblanishi belgilangan.

MSK raisining ta’kidlashicha, saylov jarayonlari mamlakatning tuman va shaharlaridagi 207 ta saylov uchastkalariga o‘rnatilgan 414 ta videokameralar orqali onlayn translatsiya qilindi.

Ovoz berish jarayonlari akkreditatsiyadan o‘tgan 1672 nafar mahalliy va xorijiy ommaviy axborot vositalarining vakillari tomonidan keng yoritildi.

Mamlakat bo‘ylab barcha saylov uchastkalari yopildi. Komissiya a’zolari ovozlarni hisoblashni boshlashdi.

MSK ma’lumotlariga ko‘ra, saylovning dastlabki natijalari ertaga, 25-oktabr kuni soat 16:00 da e’lon qilinadi

Sanitariya-epidemiologik osoyishtalik va jamoat salomatligi xizmati direktori Bahodir Yusupaliyevning so‘zlariga ko‘ra, respublikadagi mavjud shifoxonalarda davolanayotgan bemorlar ham prezident saylovlarida faol ishtirok etishdi. Jumladan, mustaqil yurish imkoniyati bo‘lgan bemorlar uchun shifoxona hududida maxsus tayyorlangan xonada, yotoq rejimidagi bemorlar uchun maxsus mobil saylov qutilari orqali ovoz berishlari tashkil etildi.

COVID-19 koronavirus infeksiyasini davolashga ixtisoslashgan shifoxonalarda 25 ta saylov uchastkalari tashkil etilib, shifoxonada davolanayotgan 3 ming nafar saylovchi (bemorlar) ovoz berishlari uchun imkoniyat yaratildi.

MSK raisi o‘rinbosari Bahrom Qo‘chqorovning so‘zlariga ko‘ra, saylov kuni o‘tkazilgan monitoring natijalari ba’zi saylov uchastkalarida “oilaviy” ovoz berish holatlari qayd etilganini ko‘rsatmoqda.