TOShKENT, 6-iyun — Sputnik, Dilshoda Raxmatova. Butunjahon sog‘liqni saqlash tashkiloti Yevropa mintaqaviy burosi rahbari Xans Klyuge ilgariroq aksariyat davlatlar tomonidan cheklovlarning bekor qilinishi holati COVID-19 infeksiyasining takroriy avjini yuzaga keltirishi mumkin, deya fikr bildirgan edi.
Agar buning oldi olinmasa, xavfli epidemiyaning ikkinchi to‘lqini yanada talafotli kelishi mumkin.
O‘zbekiston Sog‘liqni saqlash vazirining birinchi o‘rinbosari, sanitariya-epidemiologik osoyishtalik agentligi rahbari Bahodir Yusupaliyev BSST vakili tilga olgan xavflar borasidagi taxminlarga qo‘shilishini, biroq, ko‘plab davlatlar qatorida O‘zbekiston ham cheklovlarni hisob-kitoblarga asoslangan holda va tanlangan hududlardagina yumshatayotganini, retsidiv jarayonlarning oldini olish uchun barcha choralar ko‘rilayotganini aytdi.
"Bizda hozirda birinchi to‘lqin davom etmoqda. Bir sutka davomida ayrim holatlarda 60-70tagacha kasallar qayd etilmoqda, ammo ularning aksariyati - chetdan kirib kelgan, mahalliy aholi orasidagi ko‘rsatkich past", - deya tushuntirdi mutaxassis Sputnik O‘zbekiston muxbiri bilan suhbat davomida.
Uning aytishicha, bu holat dunyoda koronavirusning hatto birinchi to‘lqini hali o‘z nihoyasiga yetmaganini bildiradi.
Shu bilan birga, Yusupaliyev, koronavirusning ikkinchi to‘lqini davomida oldin ushbu kasallikka oldin chalinmaganlar infeksiyani yuqtirishi mumkin, degan gipotezaga qo‘shilmasligini bildirdi.
"Men bunday keskin bayonotlar bermagan bo‘lardim. Aniq holatda tegishli choralar qabul qilinadi. Xususan, O‘zbekistonda joriy qilingan qat’iy karantin choralari epidemiyaning oldini olishda o‘zining ijobiy ta’sirini ko‘rsatdi – bemorlanganlar soni bo‘yicha eng past ko‘rsatkich bizda. Shu bilan birga hozirda respublikada epidemiya holati pastlay boshlagan", - dedi u.
Koronavirus pandemiyasi qachon tugaydi, degan savolga javob berar ekan, Yusupaliyev, bu ilmiy-tibbiy hamjamiyat uchun nihoyatda murakkab savolligini ta’kidladi.
"Dunyoda hozirda birinchi to‘lqin tugagani yo‘q, ikkinchi to‘lqin boshlanishi ehtimoli mavjud. Har holda yaqin orada radikal ijobiy o‘zgarishlarni kutish nomuvofiq. Koronavirus infeksiyasining ikkinchi to‘lqini kuz fasliga to‘g‘ri kelishi ham ehtimoldan holi emas. O‘shanda yana tegishli karantin choralarini qabul qilishga to‘g‘ri keladi", - dedi Sog‘liqni saqlash vazirining birinchi o‘rinbosari.
— O‘zbekiston mana shunday sharoitda erta ochilmayaptimi, nima deb o‘ylaysiz?
— Har qanday davlat uchun aholi salomatligi - eng muhim masalalardan biridir. Ammo shunday sharoitda bundan kam bo‘lmagan jiddiy oqibatlarga sabab bo‘ladigan iqtisodiy inqirozga yo‘l qo‘yib bermaslik uchun zarur chora-tadbirlarni qo‘llash lozim.
Ayni vaqtda esa aholimizga ularning shu holatni tushunib, karantin qoidalariga og‘ishmay amal qilganliklari uchun minnatdorlik bildirmoqchiman. Ikki oy davomida deyarli uy sharoitida davom etgan karantinda haqiqiy qahramonlik ko‘rsatildi. Bugungi sekin-asta va ma’lum hududlarda yumshatilayotgan karantin choralari esa mamlakat iqtisodiy barqarorligi va fuqarolarimizning moliyaviy farovonligi uchun zarur. Ammo gap cheklovlarning to‘liq ochib tashlanishi haqida bormayapti - umumiy karantin hali bekor bo‘lgan emas.
— Jazirama issiq COVID-19ga qarshi kurashda yordam beradi, degan gipoteza bor, bu prognozlar o‘zini nechog‘lik oqlaydi?
— Koronavirus infeksiyasining ushbu turi hali yetarlicha o‘rganilmagan. Mutaxassislar ko‘plab savollarga aniq javob ololgan emas. Statistik raqamlarga murojaat qiladigan bo‘lsak, havo harorati yuqori bo‘lgan kunlarda ham kasallik qayd etilishi holatlarida o‘sish ro‘y berganini ko‘rish mumkin. Demak, bu yerda virusning yo‘qolishi va havo harorati o‘rtasida to‘g‘ridan-to‘g‘ri bog‘liqlik kuzatilmayapti. Bunday sharoitda esa xulosa qilishga shoshilib, infeksiya jazirama kunlarda o‘z-o‘zidan g‘oyib bo‘lishiga umid qilish kerak emas.
