"O‘zbekiston" TRK raisi nega ishdan olindi?

TOShKENT, 3-avgust — Sputnik. Xurshid Mirzohidov O‘zbekiston milliy teleradiokompaniyasi rahbari lavozimidan ozod qilindi.

MTRK rasmiy saytida ham Mirzohidovning familiyasi rahbarlar ro‘yxatidan olib tashlangan.

Mirzohidov 2017-yilning fevralida teleradiokompaniya raisi etib tayinlangan edi.

Iyul oyi oxirida MTRK kunu-tun faoliyat ko‘rsatadigan "O‘zbekiston 24" telekanalini ishga tushirgan edi.

Eslatib o‘tamiz, "Kamolot"  YoIH IV qurultoyida O‘zbekiston prezidenti o‘z chiqishi davomida Ozodbek Nazarbekovni "Yoshlar"ga rahbar etib tayinlar ekan "Mirzohidov degan kattakon qani, shu yerdami? Ertadan boshlab "Yoshlar" kanalining rahbari Ozodbek Nazarbekov bo‘ladi, agar xalaqit bersalaring 50% odamingni qisqartiraman, tushundingimi" deb aytgan edi.

30 iyul kuni "O‘zbekiston 24" telekanalida namoyish etilgan "Tahlilnoma" ko‘rsatuvida esa o‘tgan yillar mobaynida tashqi siyosatda yo‘l qo‘yilgan kamchiliklar ochiq-oydin tanqid qilingan.

Dastur davomida boshlovchi tomonidan aytilgan gaplar "O‘zbekiston birinchi marotaba Islom Karimov siyosatini qoraladi" degan talqinda xorij matbuotlarini aylanib chiqdi.

O‘zbekistondagi mahalliy elektron nashrlarda Xurshid Mirzohidov aynan shu ko‘rsatuv sababli ishdan olindi degan xabarlar tarqaldi, ammo sal o‘tmay "bu xabarlar rasman o‘z tasdig‘ini topmadi" deya raddiya berdi.

O‘zbekiston Xalq shoiri Xurshid Davron MTRKdagi o‘zgarishlar xususida o‘zining Feysbukdagi akkauntida quyidagicha post qoldirgan:

"Alisher Xodjayev (bu mening savodsizligim emas, pasportida shunday) o‘rniga tayinlangan Xurshid Mirzohidov ham ishdan ketibdi. Yarim yil ishlamasdan ketdi. Xurshid Mirzohidov bilan ishlaganman, yaxshi odam. Umr bo‘yi telemarkazda ishlagan Sobir akaning o‘g‘li. Otasi, ozgina mahalliychiligini hisobga olmasak, durust odam, professional. Bir necha yil u kishi texnika, men esa ("Yoshlar"u "O‘zbekiston" TRK direktorligidan keyin) mafkura sohasida raisga maslahatchi bo‘lganmiz.

Ammo, Alisher Xodjayevning ham, Xurshid Mirzohidovning ham MTRK — Milliy teleradiokompaniyaga rahbar etib tayinlanganini-yu tayinlanishini TV va radio faoliyatiga zid ekanini qat’iy aytishim kerak. 20-yillik TVdagi faoliyatim buni qat’iy aytishimga sababdir. TV va radio faoliyatini ikki dunyoda ham texnar xodim boshqarmasligi shart. TV va radio eng avvalo mafkura va ijod. Ayni shuning uchun bu tizimni mafkura bilan ijodni uyg‘un etgan ma’rifatchi kishi boshqarishi kerak (Aytishim shart va lozimki, bu o‘rinda mutlaqo o‘zimni ko‘rmayapman). Bilmadim, bundan keyin kim MTRK rahbari bo‘ladi. Davlat maslahatchisi maqomidagi o‘zbek Beriyasi taklifi bilan yana qaysi uning odami (odami ham bo‘lmasligi mumkin, unga muhimi og‘izsiz va tilsiz bo‘lishi shart.

Yaqinda tasdiqlangan matbuot qo‘mitasi rahbariga o‘xshagan) tayinlanadi-yu bir necha oydan keyin ishni battar qilib ishdan ketarkan? Lekin, juda va juda uzoq ishlashi ham mumkin. Bu esa nafaqat TV va radioga, umummilliy taraqqiyotga faqat zarar keltiradi".

Hozirgacha hech bir rasmiy manbada Mirzohidov nega ishdan olingani sababi ma’lum qilinmadi.