Farg‘ona sudyalari viloyat xalqi oldida qasamod qildilar

TOShKENT, 5-iyul — Sputnik. Farg‘ona viloyati hokimligi rasmiy saytida Farg‘ona viloyati sudyalarining Farg‘ona xalqiga murojaati e’lon qilindi. 

"Joriy yilning 13-iyun kuni Toshkent shahrida davlatimiz rahbari tomonidan sudyalar bilan o‘tkazilgan yig‘ilishda, shuningdek 22-iyundagi Farg‘ona viloyati faollari bilan bo‘lgan uchrashuvda sud organlari faoliyatida, jumladan, Farg‘ona viloyatida ham shu sohada yo‘l qo‘yilayotgan xato va kamchiliklar tanqidiy tahlillarga asoslangan holda ro‘y-rost ko‘rsatilib, istiqboldagi qator dolzarb vazifalar belgilab berildi.

Bildirilgan tanqid va haqli e’tirozlardan to‘g‘ri xulosa qilib, soha rivojiga tanqidiy yondashishimiz, hayotning o‘zi oldimizga qo‘yayotgan biri-biridan muhim va dolzarb vazifalarni samarali hal qilish yuzasidan aniq takliflar ishlab chiqishimiz kerakligini, bunda amaliy tashabbuslar lozimligini tushunib yetdik", — deyilgan murojaat matnida.

Farg‘ona viloyat sudyalari bundan keyingi faoliyatini qonunlarga asoslanib adolatli qaror chiqarish, xalq bilan bevosita muloqot qilib fuqarolarni sudga bo‘lgan ishonchini mustahkamlash hamda mavjud kamchiliklarni bartaraf etishga va’da bergan.

"Birinchidan, faoliyatimizni yana bir bor qaytadan tanqidiy tahlil qilib, odil sudlovni amalga oshirishdagi to‘siqlarni tag-tomiri bilan bartaraf qilamiz, sudni tom ma’noda "Adolat qo‘rg‘oni"ga aylantirishda bor bilim va tajribamizni safarbar etamiz. Sudga borgan har bir farg‘onalik faqat adolat topishiga kafolat beramiz.

Ikkinchidan, kundalik faoliyatimizda xalq bilan bevosita yuzma-yuz ochiq muloqot shakllarini kengaytiramiz, ularning muammolarini hal etishda yaqindan yordam berish orqali buzilgan huquqlarini tiklaymiz va haqiqatni qaror toptiramiz.

Uchinchidan, har bir shaxs qonun himoyasida ekanligiga ishonchi komil bo‘lishi uchun sudlarda ishlarni mustaqil, oshkora ko‘rib chiqamiz, natijasi bo‘yicha ish holati va qonun talablariga mos adolatli qarorlar qabul qilamiz.

To‘rtinchidan, sud hujjati O‘zbekiston Respublikasi nomidan chiqarilishini inobatga olgan holda qabul qilingan har bir qarorimiz qonuniy va adolatli bo‘lishi uchun shaxsiy javobgarligimizni oshirib, xatoga yo‘l qo‘yishga hech qanday haqimiz yo‘qligini to‘liq anglab yetishimiz zarur.

Har bir hujjatni qabul qilishda ongimizda — adolat, tilimizda — haqiqat, dilimizda — poklik ustivor bo‘ladi.

Beshinchidan, faoliyatimizda ochiqlikni ta’minlash hamda sud organlari tomonidan amalga oshirilayotgan ishlar yuzasidan xalqimizni xabardor qilib borish maqsadida tizimli ravishda halq deputatlari mahalliy kengashlariga axborot berib boramiz, bunda o‘zimizning faoliyatimizga tanqidiy baho berib, xato va kamchiliklarimizni, shuningdek kelgusidagi vazifalarimizni jamoatchilik bilan muhokama qilishni o‘z burchimiz deb bilamiz.

Oltinchidan, endilikda odamlar sudga emas, aksincha biz — sudyalar odamlar oldiga borib, ishlarni sayyor sudlarda keng jamoatchilik ishtirokida ko‘rib chiqamiz va xalqning fikriga tayangan, adolatli qaror qabul qilinishini ta’minlaymiz.

Yettinchidan, sudyalik sha’niga dog‘ tushiradigan nopok xodimlarga oramizda o‘rin yo‘q, safimizni ulardan tozalab boramiz, adolatga xiyonat qilganlarga nisbatan murosasiz kurashib, ularning qonun oldida javobgarligini va jazoning muqarrarligini ta’minlashga so‘z beramiz".

Sudyalar, shuningdek, tanqidiy tahlil, qat’iy tartib-intizom va shaxsiy javobgarlikni o‘zlari uchun kundalik qoida, faoliyatlarining asosiy mezoniga aylantirishga so‘z berganlar.

"Zimmamizga yuklangan mas’uliyatli vazifalarni sidqidildan bajarishga, jonajon vatanimizga sadoqat bilan xizmat qilishga, xalqimiz va Prezidentimiz oldida bergan qasamodimizga hamisha sodiq qolishga va’da beramiz!", — deb yakun yasalgan murojaatga.