O‘zbekistonda odil sudlov akademiyasi tashkil etiladi

© Sputnik / Andrey Starostin / Mediabankka o‘tishSudya bolg‘achasi
Sudya bolg‘achasi - Sputnik O‘zbekiston
Obuna bo‘lish
13 iyun kuni o‘tkazilgan sud tizimiga bag‘ishlangan videoselektor davomida O‘zbekiston prezidenti ixtisoslashgan o‘quv muassasasi - Odil sudlov akademiyasini tashkil etish haqida taklif bildirdi

TOShKENT, 14-iyun — Sputnik. Yig‘ilishda sudyalarni kasbga tayyorlash va malakasini oshirish tizimini yanada takomillashtirish masalasi atroflicha muhokama qilindi. Prezidentimiz tomonidan bu boradagi ishlar samaradorligini oshirish maqsadida ixtisoslashgan o‘quv muassasasi — Odil sudlov akademiyasini tashkil etish haqida bildirilgan taklif yig‘ilish qatnashchilari tomonidan qo‘llab-quvvatlandi, deb xabar qildi O‘zbekiston prezidenti matbuot-xizmati.

Mirziyoyev yig‘ilish davomida bugungi kunda xalq kutayotgan adolatli qarorlar qabul qilishga har tomonlama qodir, irodasi mustahkam, yuksak kasb va ma’naviy fazilatlarga ega bo‘lgan sud xodimlari tarkibini shakllantirish eng muhim vazifa bo‘lib qolayotganini ta’kidlagan. "Shu ma’noda o‘z sohasini yaxshi bilmaydigan, puxta kasb va hayot tajribasiga, yuksak ma’naviy-axloqiy saviyaga ega bo‘lmagan yurist kadrlar hech qachon sudya lavozimiga tayinlanmasligi kerak", degan O‘zbekiston prezidenti.

Yig‘ilishda adolat va ma’naviyat — o‘zaro chambarchas bog‘liq tushunchalar ekani, ma’naviyat bo‘lmagan joyda hech qachon adolat bo‘lmasligi, shuning uchun ham sudyalar, yurist kadrlarni tayyorlash va sudyalik lavozimiga tayinlashda bu masalaga alohida e’tibor qaratish lozimligi uqtirib o‘tildi.

O‘zbekiston prezidenti Shavkat Mirziyoyev - Sputnik O‘zbekiston
Shavkat Mirziyoyev yana bir videoselektor yig‘ilishini o‘tkazdi
Aynan ma’naviy fazilatlarning yetishmasligi tufayli ayrim sudyalar o‘rtasida qonunga zid harakatlar sodir etish, nopoklik, ta’magirlik, odamlarning dardu tashvishlariga loqayd qarash, adolat mezonlariga xilof ravishda qarorlar qabul qilish holatlari uchrab kelayotgani qattiq tanqid qilindi. O‘zbekiston Respublikasi Oliy sudining sobiq rahbarlari aynan ana shunday o‘ta muhim masalalarga vaqtida e’tibor qaratmagani tufayli sohada jiddiy kamchilik va muammolar vujudga kelgani afsuslanarli holat ekani ta’kidlandi.

Oliy sudning yangi rahbarlari oldiga bunday kamchilik va muammolarni tezlik bilan bartaraf etish, sud organlari va sudyalar faoliyatini qonun va adolat talablari asosida samarali tashkil etish bo‘yicha zarur chora-tadbirlar ko‘rish bo‘yicha aniq vazifalar qo‘yildi.

Ayniqsa, fuqarolarning sud idoralarida sarson-sargardon bo‘lishining oldini olish, ishlarni o‘z vaqtida ko‘rmasdan, odamlarni ovora qilgan sud xodimlariga munosib baho berish zarurligi qat’iy ta’kidlandi. Shu maqsadda ilgari surilgan muhim bir fikr — har bir sudya tomonidan aholi bilan joylarda bir oyda kamida bir marta ochiq muloqotlar tashkil etish haqidagi taklif ishtirokchilar tomonidan to‘liq ma’qullandi.

Sudya lavozimida faoliyat ko‘rsatayotgan sud xodimlari o‘z faoliyati yuzasidan xalq deputatlari mahalliy Kengashlarida axborot berishi bilan bog‘liq amaliyotni yo‘lga qo‘yish vaqti kelgani qayd etildi. Bundan buyon sudyalar faoliyatiga, birinchi navbatda, xalqning o‘zi baho beradi, dedi Mirziyoyev.

Bizning Telegramdagi o‘zbekcha kanalimizga obuna bo‘ling va eng yangi xabarlarni birinchi bo‘lib o‘qing.

Yangiliklar lentasi
0