TOShKENT, 10 avg — Sputnik. Putin va Erdo‘g‘on uchrashuvida muhokama qilingan eng muhim mavzular haqida ma’lumotlarni e’tiboringizga havola qilamiz.
Rossiya va Turkiya prezidentlari Vladimir Putin va Toyib Erdo‘g‘on o‘rtasidagi muzokaralar ikki soatga yaqin davom etgan, so‘ngra tomonlar hamkorlik masalalarini kengaytirilgan tartibda muhokama qilishga o‘tganlar. Putin va Erdo‘g‘on uchrashuvini yoritish uchun Rossiya, Turkiya, Amerika, Yevropa va Arab davlatlari OAVlarining 138 nafar vakillari akkreditatsiya qilingan.
E’tiborli jihati, ikkala tomon ham uchrashuv yakuni bo‘yicha optimistik baho bergan. Jumladan, Erdo‘g‘on Putinni "qadrdon do‘stim", deb atab, Moskva va Anqara munosabatlari tez orada inqiroz davrigacha bo‘lgan darajaga ko‘tarilishini ta’kidlagan.
Turkiyadagi harbiy isondan so‘ng Putinning qo‘ng‘irog‘i Erdo‘g‘onni xursand qilib yuborgan
Turkiya yetakchisi Rajab Toyib Erdo‘g‘on Turkiyadagi harbiy isondan so‘ng Putinning qo‘ng‘irog‘i uni, hamkasblarini va butun turk xalqini juda xursand qilganini aytdi.
Turkiya-Rossiya o‘rtasidagi aviaparvozlar tez orada tiklanadi
Rossiya prezidenti tez orada mamlakatlar o‘rtasidagi charter reyslar tiklanishini aytib o‘tdi. Turkiya prezidenti Erdo‘g‘on, bu savolga sharh berar ekan, Anqara "xalqlarni birlashtirib turgan" sayyohlik parvozlaridan haqiqatan ham katta daromadlar olganini tan oldi. Putin, o‘z navbatida, Turkiya uchun kiritilgan viza tartibining bekor qilinishi ayni damda muhim rol o‘ynashini, bu "iqtisodiy hamkorlik masalalari" uchun naqadar muhimligini alohida ta’kidlab o‘tdi.
Rossiya va Turkiya hamkorligi — mintaqadagi ko‘plab muammolar yechimini kafolatlaydi
Turkiya prezidenti Rajab Toyib Erdo‘g‘on Vladimir Putin bilan uchrashuvda ikki davlat o‘rtasidagi hamkorlik regionda mavjud muammolar yechimini topishga yordam berajagini ma’lum qildi.
"Regionda, siyosiy nuqtayi nazardan, biz bilan sizdan ko‘p narsani umid qilishmoqda. Ishonchim komil, sizu bizning hamkorligimiz regionda mavjud muammolarga yechim topishda yordam beradi", — deb ta’kidladi Erdo‘g‘on.
"Akkuyu" va "Turk oqimi"ning jonlantirilishi
Kutilganidek, Moskva va Anqaraning hamkorlikdagi loyihalari "Akkuyu" AES va "Turk oqimi" gaz o‘tkazgichining keyingi taqdiri hal bo‘ldi.
Turkiya prezidenti Erdo‘g‘on ikki loyiha ham qayta tiklanishi va qurilish oxiriga yetkazilishini tasdiqladi.
"Ba’zi bir ruxsatnomalarga keladigan bo‘lsak, turkiyalik hamkasblarimizdan minnatdormiz: "Janubiy oqim" loyihasidan farqli o‘laroq, hattoki munosabatlarimizdagi inqirozga qaramay, o‘tgan davr mobiynida Turkiya tomon o‘z ishini to‘xtatmadi va "Tukr oqimi"ga doir muhim ruxsatnomalar va masalalar hozirda rasmiylashtirildi va bizga taqdim etildi", — deb aytdi muzokara davomida Putin.
Turk oqimi yuzasidan qabul qilingan qaror "Gazprom" aksiyalari narxining shiddat bilan o‘sishini keltirib chiqardi, deb yozadi RIA Novosti.
"Akkuyu" AESiga keladigan bo‘lsak, Erdo‘g‘onning aytishicha, Anqara ushbu loyihaga strategik sarmoya maqomini taqdim etishga tayyor.
Iqtisodiy choralarning bekor qilinishi
Ikkala rahbar ham iqtisodiy hamkorlik darajasini inqirozgacha bo‘lgan darajaga chiqarish haqida gap ochdi.
Bundan tashqari, rasmiy Kreml hukumat darajasida 2016-2019 yillar uchun Turkiya bilan hamkorlik dasturini qabul qilishini ma’lum qildi.
Suriya masalasi
Jurnalistlar tomonidan berilgan Suriya muammosiga oid savollarga javob berar ekan, Putin ham, Erdo‘g‘on ham bu masala alohida muhokama qilinishini ta’kidlaganlar.
"Biz mana shu masala yuzasidan tashqi ishlar vazirlari, maxsus xizmat vakillari bilan alohida yig‘ilish o‘tkazib, ma’lumot almashishga va ma’lum yechimlar topishga kelishib oldik", — degan Putin bu masalada Anqara va Moskva pozitsiyalari hamisha ham bir joydan chiqmaganini qo‘shimcha qilgan holda.
