Zelenskiy 2022-yilda Donbassni berishga rozi bo‘lgan — sobiq matbuot kotibi intervyusi
11:52 12.05.2026 (yangilandi: 12:13 12.05.2026)
© CC BY-SA 4.0 / Administratsiya Prezidenta Ukraini /
Obuna bo‘lish
Zelenskiyning sobiq matbuot kotibi Yuliya Mendel Taker Karlsonga intervyusida Donbass, Istanbul muzokaralari, NATO va tinchlik kelishuvi haqida keskin bayonotlar berdi.
TOShKENT, 12-may — Sputnik. Zelenskiyning sobiq matbuot kotibi Yuliya Mendel amerikalik jurnalist Taker Karlsonga bergan intervyusida Ukraina rahbariyati, 2022-yildagi Istanbul muzokaralari va tinchlik kelishuvi haqida bir qator keskin bayonotlar berdi.
Uning asosiy bayonotlari quyidagicha:
1. Istanbul muzokaralari haqida
Mendelning aytishicha, u 2022-yilda Istanbuldagi muzokaralarda Ukraina nomidan qatnashgan odamlar bilan gaplashgan.
“Menga ular hamma narsaga rozi bo‘lganliklarini batafsil tushuntirishdi. Bundan tashqari, ular Zelenskiy shaxsan Donbassni berishga rozi bo‘lganini aytishdi”, — dedi u.
Mendel Zelenskiyning hozirgi pozitsiyasi avvalgisidan farq qilishini ta’kidladi.
“Hozir esa u ko‘p millionli auditoriya oldida turib: "Men Donbassni bera olmayman", deyapti. Ko‘rdingizmi, u izchil emas. U doimo o‘z pozitsiyasini o‘zgartirib turadi”, — dedi Mendel.
2. Zelenskiyni tinchlik yo‘lidagi to‘siq deb atadi
Mendel Zelenskiyga nisbatan shaxsiy adovati yo‘qligini, biroq uni tinchlik yo‘lidagi asosiy to‘siqlardan biri deb hisoblashini aytdi.
“Menda shaxsiy qasos yo‘q, lekin u tinchlik yo‘lidagi asosiy to‘siqlardan biri deb hisoblayman”, — dedi u.
Uning fikricha, urushning yakunlanishi Zelenskiy uchun siyosiy jihatdan xavfli bo‘lishi mumkin.
“U urushni davom ettirish va yanada ko‘proq pul olish uchun doimo pozitsiyalarini o‘zgartirib turadi”, — deya ta’kidladi Mendel.
3. Ukrainada tinchlik istaydiganlar borligini aytdi
Mendel Ukraina hokimiyati ichida ham tinchlik kelishuvi tarafdorlari borligini bildirdi.
“Hamma qo‘rqadi. Zelenskiyning chegaralari yo‘q... Bugun u zaif vaziyatda va uning hukumatida, hokimiyat vertikalida tinchlikni xohlaydigan ko‘plab odamlar bor”, — dedi u.
4. Zelenskiy frontdan jazo sifatida foydalanishini da’vo qildi
Mendel Zelenskiy uni tanqid qilgan odamlarni jazolash uchun frontga jo‘natish holatlaridan foydalanishini iddao qildi.
“Zelenskiy front chizig‘idan jazo sifatida foydalanmoqda... U hatto bu haqda ochiq gapirdi”, — dedi u.
5. Ukraina uchun tinchlik kelishuvi yagona yo‘l ekanini aytdi
Mendel G‘arbda Ukrainani qo‘llab-quvvatlash tinchlik kelishuvini talab qilish orqali amalga oshishi kerakligini ta’kidladi.
“Odamlar tushunishlari kerakki, agar siz Ukrainani qo‘llab-quvvatlamoqchi bo‘lsangiz, buni amalga oshirishning yagona yo‘li tinchlik kelishuvini talab qilishdir”, — dedi u.
Uning fikricha, Ukraina uchun bu “omon qolishning yagona yo‘li”.
“Ukraina uchun bu omon qolishning yagona yo‘li, chunki biz yo‘q bo‘lib ketish arafasida turibmiz”, — deya qo‘shimcha qildi Mendel.
6. NATO bo‘yicha 2019-yildagi va’da haqida
Mendel 2019-yilda Parijda bo‘lib o‘tgan uchrashuvda Zelenskiy Rossiya prezidenti Vladimir Putinga Ukraina NATOga kirmasligi haqida va’da berganini aytdi.
“U Putin bilan shaxsiy muhokama o‘tkazgan, unda Ukraina hech qachon NATOga kirmasligiga va’da bergan”, — dedi u.
Uning so‘zlariga ko‘ra, o‘shanda Zelenskiy Ukraina “hech qachon NATOga yaqin bo‘lmaganini” ta’kidlagan.
