TOShKENT, 5-iyul — Sputnik. So‘nggi taqdim etilgan ma’lumotlarga ko‘ra, Markaziy Osiyo davlatlarida jami 58 218 ta koronavirus bilan bog‘liq holat qayd etilgan.
Qozog‘iston
Qozog‘iston hukumati respublikada epidemiologik vaziyat yomonlashgani tufayli 5-iyuldan 14 kunlik qo‘shimcha karantin cheklov choralarini joriy etish to‘g‘risida qaror qabul qildi. Mamlakat mintaqada holat va o‘lim bo‘yicha hamon yetakchilik qilmoqda. Qozog‘istonda o‘tgan kun davomida 1452 ta yangi holat tasdiqlangan. Kasallanganlarning umumiy soni 47 171 (jumladan, kasallik alomatlarisiz o‘tayotgan bemorlar) nafarga yetgan. Shulardan 15 556 nafari tuzalib ketgan. Jami 188 ta o‘lim holati kuzatilgan. 29-iyundan qayd etilgan o‘lim holatlari yangilanmagan.
O‘zbekiston
4 iyul kuni mamlakatda 312 ta yangi holat aniqlangan. Shundan 162 tasi karantin muassasalarida, 142 tasi aholi orasida (shundan 105 tasi Toshkent shahrida, 36 tasi Toshkent viloyatida, 1 tasi Buxoro viloyatida), 8 tasi xalqaro yuk tashuvchi avtomashina haydovchilarida orasida aniqlangan. Bir kunda 174 bemor tuzaldi va uylariga kuzatildi.
2020 yil 5-iyul soat 10:00 holatiga ko‘ra, O‘zbekistonda koronavirus infeksiyasi qayd etilganlar soni 9829 (+121) nafarni tashkil etmoqda.
Respublika bo‘ylab 6425 nafar (66 foiz) bemor butunlay davolanib chiqqan. Mamlakatda epidemiya boshlangandan buyon 32 ta o‘lim holati kuzatilgan. Hafta davomida 12 yangi o‘lim qayd etildi.
O‘zbekistonda ham 1-iyuldan karantin choralari kuchaytirildi. Barcha hududlarida yirik buyum bozorlari hamda buyum savdosi bilan shug‘ullanadigan yirik savdo majmualari haftaning shanba va yakshanba kunlari sanitariya-dezinfeksiya ishlarini amalga oshirish uchun yopiladi. “Qizil” va “sariq” hududlarda soat 07:00 dan 23:00 ga qadar jamoat joylarida uch kishidan ortiq to‘planish hamda 23:00 dan 07:00 ga qadar ko‘chalarda, ko‘p qavatli uylar va hovlilar oldida bo‘lish taqiqlandi. “Qizil” va “sariq” hududlarda haftaning shanba va yakshanba kunlarida jamoat transporti harakati kamaytirildi.
Qirg‘iziston
Qirg‘izistonda so‘nggi kunlarda koronavirus yuqtirib olish holati keskin ko‘paygan. Endi mamlakat koronavirus qurbonlari soni bo‘yicha Tojikistonni ortda qoldirib, mintaqada ikkinchi o‘ringa ko‘tarilgan.
Kasallanganlarning umumiy soni 7377 nafarni tashkil etmoqda. Shulardan 2802 nafari (37,9 foizi) COVID-19ni yenggan. Jami 88 ta o‘lim holati kuzatilgan.
Kasallik kundan kunga avj olayotgani bois Bishkek meriyasi hozirda ma’lum sabablarga ko‘ra ishlamayotgan tibbiyot xodimlaridan ko‘mak berishni so‘ragan.
Tojikiston
Tojikistonda mintaqada eng oxirida (30 aprel kuni) koronavirus aniqlangan edi. So‘nggi ma’lumotlarga ko‘ra, aniqlanayotgan kunlik holatlar 50-55 tani tashkil etadi. Qayd etish joizki, bu mintaqadagi boshqa mamlakatlarda kasallik avj olayotgan vaqtda bir necha baravarga kamroq.
O‘tgan kun davomida 51 kishida koronavirus aniqlangan bo‘lsa, 47 kishi darddan forig‘ bo‘lgan.
Koronavirus bilan kasallanganlarning umumiy soni 6159 nafarga yetgan. Shulardan 4809 nafari (78,1 foizi) tuzalib ketishga muvaffaq bo‘lgan. Qurbonlar soni esa 52 kishini tashkil etmoqda. Hafta davomida qurbonlar soni o‘zgarmagan.
Turkmanistonda esa hozirga qadar koronavirus rasman qayd etilmagan va u mintaqadagi infeksiyadan xoli mamlakat bo‘lib turibdi.
Butun dunyo bo‘ylab 11 milliondan ziyod kishi koronavirus yuqtirib olgan. 6 milliondan ortiq kishi shifo topgan. Qurbonlar soni 530 mingdan oshgan.
