TOShKENT, 28-iyun — Sputnik. So‘nggi taqdim etilgan ma’lumotlarga ko‘ra, Markaziy Osiyo davlatlarida jami 39 052 ta koronavirus bilan bog‘liq holat qayd etilgan.
Qozog‘istonda vaziyat og‘irligicha qolmoqda. Mamlakat mintaqada holat va o‘lim bo‘yicha yetakchilik qilmoqda. Qozog‘istonda o‘tgan kun davomida 461 ta yangi holat tasdiqlangan va birdaniga 16 kishi vafot etgan. Kasallanganlarning umumiy soni 20 780 nafarga yetgan. Shulardan 12 824 nafari tuzalib ketgan. Jami 173 ta o‘lim holati kuzatilgan. Hafta davomida 55 kishi virus qurboniga aylangan. Bundan tashqari, Qozog‘istonda kasallik alomatlarisiz o‘tayotgan bemorlar soni 15 573 nafarga yetgan. Bu ham o‘tgan haftaga qaraganda deyarli bir baravarga ko‘proq. Ular alohida qayd etiladi va asosiy statistikaga kiritilmaydi.
O‘zbekistonda o‘tgan kun davomida 255 ta yangi holat aniqlandi. Shundan 169 tasi karantin muassasalarida, 54 tasi aholi orasida (39 ta Toshkent shahrida, 6 ta Toshkent viloyatida, 4 ta Sirdaryo viloyatida, yana 4 ta Surxondaryo viloyatida, 1 ta Buxoro viloyatida), qolgan 32 tasi esa xalqaro yuk tashuvchi avtomashina haydovchilari orasida aniqlangan. Qolaversa, kunlik tuzalish rekordi yangilangan: bir kunda 202 bemor tuzaldi va uylariga kuzatildi.
Aholi orasida koronavirusga chalinish holati biroz oshgan. Masalan, “O‘zbekiston temir yo‘llari” AJ xodimi, shahar ichki ishlar tizimi xodimi, poytaxtdagi avtosaroy konduktorida koronavirus aniqlangan. Shuningdek, Buxoro davlat universiteti magistrida (Afg‘oniston fuqarosi), Xorazm viloyati Xonqa tumanida yashovchi fuqaro va uning 7 nafar oila a’zosida ham koronavirus tasdiqlangan.
2020 yil 28-iyun soat 10:00 holatiga ko‘ra, O‘zbekistonda koronavirus infeksiyasi qayd etilganlar soni 7725 (+43) nafarni tashkil etmoqda.
Respublika bo‘ylab 5240 nafar (67 foiz) bemor butunlay davolanib chiqqan. Mamlakatda epidemiya boshlangandan buyon 20 ta o‘lim holati kuzatilgan.
Tojikistonda mintaqada eng oxirida (30 aprel kuni) koronavirus aniqlangan edi. So‘nggi ma’lumotlarga ko‘ra, aniqlanayotgan kunlik holatlar 70 taga yetmaydi. Qayd etish joizki, bu mintaqadagi boshqa davlatlarga qaraganda bir necha baravarga kamroq.
O‘tgan kun davomida 52 kishida koronavirus aniqlangan bo‘lsa, 60 kishi darddan forig‘ bo‘lgan. Koronavirus bilan kasallanganlarning umumiy soni 5799 nafarga yetgan. Shulardan 4391 nafari (75,7 foizi) tuzalib ketishga muvaffaq bo‘lgan. Qurbonlar soni esa 52 kishini tashkil etmoqda.
Qirg‘izistonda o‘tgan sutka davomida 309 ta yangi holat aniqlangan. Kasallanganlarning umumiy soni 4748 nafarni tashkil etmoqda. Shulardan 2242 nafari (47,2 foizi) COVID-19ni yenggan. 77 ta o‘lim holati kuzatilgan. Bu o‘tgan haftaga qaraganda 10 taga ko‘proq.
Qirg‘izistonda koronavirus prezident devonigacha kirib borgan. Jami 26 nafar xodim, jumladan, devon rahbarida ham koronavirus aniqlangan.
Turkmanistonda esa hozirga qadar koronavirus rasman qayd etilmagan va u mintaqadagi infeksiyadan xoli mamlakat bo‘lib turibdi.
Butun dunyo bo‘ylab 10 millionga yaqin kishi koronavirus yuqtirib olgan. 5,4 milliondan ortiq kishi shifo topgan. Qurbonlar soni 500 mingdan oshgan.
