TOShKENT, 2 apr - Sputnik. Yangi turdagi koronavirus vaksinasi ustida ishlayotgan xitoylik shifokorlar o‘z sinov geografiyasini chet mamlakatlarga kengaytirish niyatida, deb xabar beradi South China Morning Post.
Eslatib o‘tamiz, COVID-19 ga qarshi vaksinani ishlab chiqish Xitoy Xalq-Ozodlik Armiyasi Harbiy Tibbiyot Akademiyasi olimlari va mamlakatdagi farmatsevtika kompaniyalarining mutaxassislari tomonidan amalga oshirilmoqda, vaksina ustida olib borilayotgan ishlarda Ebola virusiga qarshi vaksina tajribasi hisobga olingan.
Vaksinaning klinik sinovlari 16-mart kuni Uxanda boshlandi, unda yuzdan ortiq ko‘ngillilar ishtirok etdi. Olimlar noma’qul ta’sirning namoyon bo‘lishini aniqlash, shuningdek, ishtirokchilar tanasida koronavirusning S-oqsiliga qarshi maxsus antitanachalar hosil bo‘lganligini aniqlashni rejalashtirishmoqda.
"Biz virusni tez ushlab qoldik, endi vaksinani tekshirish uchun tasdiqlangan holatlar yetarli emas. Minglab odamlarning tekshiruvi talab qilinishi mumkin", - deydi virusologlar.
Tadqiqot birinchi bosqichining dastlabki natijalarini aprel oyining oxirigacha olish rejalashtirilmoqda, ammo sinovning keyingi bosqichlarida shifokorlarga ishtirokchilar sonini ko‘paytirishi kerak bo‘ladi: gap minglab odamlar haqida ketmoqda. Shuningdek, olimlar ta’kidlashlaricha, ko‘p zarar ko‘rgan mamlakatlarda o‘tkazilgan testlar yanada ishonchli natijalarga erishishga yordam beradi.
Akademiya vakillarining bayonotiga ko‘ra, Xitoy chet elda vaksinaning sinovlarini faqatgina uning samaradorligi va xavfsizligini tasdiqlash uchun boshlash niyatida. Ta’kidlanishicha, ko‘plab davlatlar tadqiqotchilar bilan hamkorlik qilishga qiziqish bildirishdi.
Jahon sog‘liqni saqlash tashkiloti 11-mart kuni yangi COVID-19 koronavirus infeksiyasining tarqalishini pandemiya deb e’lon qildi. Dunyo bo‘yicha 820 mingdan ortiq yuqtirish holatlari qayd etilgan, 40 mingdan ko‘proq odam vafot etgan.
O‘zbekistonda kasallanganlar soni 190 kishini tashkil etmoqda. 2 kishi vafot etgan.
