TOShKENT, 4 fev - Sputnik. Belarus prezidenti Aleksandr Lukashenko seshanba kuni Dobrushaga safari chog‘ida odamlarga koronavirusdan qay tarzda saqlanish borasida maslahat berdi, deb xabar qilmoqda Sputnik Belarus.
Davlat rahbari belaruslarning bu borada havotir olishlariga sabab borligini inkor etmadi.
"Biz havotir olishimiz kerak. Bir narsaga qat’iy amal qiling - qo‘lni ko‘proq yuving, ko‘chada notanish odamlar bilan kamroq kuchoqlashing. Qolgani - Sog‘liqni saqlash vazirligi zimmasida. Agar chang ko‘tarmayotgan bo‘lsak, biz bu masala bilan shug‘ullanmayapmiz, degani emas", - degan Lukashenko. Prezident so‘zlaridan BelTA iqtibos keltirgan.
Lukashenko koronavirus xavfliligini ta’kidladi, biroq ushbu muammodan ham ko‘plab kompaniyalar o‘z maqsadida foydalanib, boyiyotganini qo‘shimcha qildi.
"Shovqin solish kerak emas, shunchaki jimgina ishlash lozim", - deya ta’kidladi u.
Belarus rahbari, vaziyat murakkabligiga qaramay, boshqa mamlakatlar Xitoyni chetlashtirishi kerak emasligini qayd etdi.
Yangi virus
Dekabr yakunida Xitoy hukumati Xubey provinsiyasi markazi bo‘lgan Uxan shahrida noma’lum pnevmoniya tarqalishi haqida xabar qilingandi. Keyinchalik, kasallik qo‘zg‘atuvchisi koronavirus 2019-nCoV ekani aniqlandi.
Xitoyda yangi tipdagi koronavirus bilan kasallangan bemorlar soni 20 ming kishidan oshdi, kasallanganlarning 425 nafari vafot etdi. Xitoydan tashqari xorijiy davlatlarda qariyib 150 kishi bu virusni yuqtirdi, ulardan bir kishi vafot etdi.
Butunjahon sog‘liqni saqlash tashkiloti yangi tipdagi koronavirusning avj olishini xalqaro ahamiyatga ega bo‘lgan favqulodda holat, deb tan oldi.
