TOShKENT, 29 yanv — Sputnik. San’atkorlar ijodiga ma’lum cheklovlar qo‘yilishi bilan bir qatorda, san’atkorlar to‘laydigan davlat bojining stavkasi 10 foizdan 7 foizgacha kamaytirildi, deb yozadi "Zarafshon" gazetasi.
Abduqahhorovning aytishicha, shu kungacha bir konsert dasturi uchun san’atkordan olgan daromadining 30 %i davlat boji sifatida undirilardi. Endilikda bu foiz stavkasi 10 foizdan 7 %gacha kamaytirildi. San’atkor faoliyatini rasmiylashtirishga mavsumiy, ya’ni uch oylik litsenziya, nogiron va nafaqadagilarga bepul litsenziya berish joriy etildi.
Namoyishlarda fonogrammadan foydalanish taqiqlandi. Milliy ma’naviyatga mos kelmaydigan kliplarni ko‘rikdan o‘tkazuvchi badiiy kengash tashkil etildi. Ushbu kengash ko‘rigidan o‘tmagan, belgilangan talablarga javob bermaydigan klip mualliflarining litsenziyasi bekor qilinadi.
"San’atning hech bir turi bo‘yicha muvaffaqiyatlarga mehnatsiz erishib bo‘lmaydi. Qo‘shiqchilikda san’atkor ovozida, kayfiyatida, hatto yuz ifodasida ham xalqning ruhiyatini aks ettirishi zarur", degan "O‘zbekkonsert" rahbari.
O‘zbekiston xalq artisti Nasiba Abdullayeva Samarqand shahridagi 3-son bolalar musiqa va san’at maktabi o‘quvchilari uchun o‘tkazgan mahorat mashg‘ulotlarida qo‘shiqchilikning shu kabi sir-sinoatlari haqida so‘zlab berdi.
