TOShKENT, 10 yanv — Sputnik. O‘zbekiston Respublikasi Bosh prokuraturasi jamoatchilik bilan aloqalar va huquqiy axborot bo‘limi boshlig‘i Gulnoza Rahimova O‘zbekiston axborot agentligi muxbiriga arzon ko‘p qavatli uylardan kvartira sotib olishda firibgarliklarga yo‘l qo‘yilgan holatlar bo‘lganini tasdiqladi.
"Toshkent shahar prokuraturasi tomonidan qurilayotgan arzon uy-joylarni taqsimlash jarayonini o‘rganishga oid tekshirish o‘tkazildi. Bu jarayonda Shayxontohur, Chilonzor, Uchtepa, Mirobod va Yakkasaroy tumanlarida rasmiy hujjatlarni soxtalashtirish, ya’ni ish joyi va oylik maoshiga oid hujjatlarda yolg‘on ma’lumotlar aks ettirish kabi holatlar aniqlandi", — degan u.
Ta’kidlanishicha, Shayxontohur, Chilonzar va Yakkasaroy tumanlarida bu borada mansab vakolatini suiiste’mol qilish holatlariga yo‘l qo‘yilgan. Tegishli komissiyalar mas’ullari uy-joy ajratish bilan bog‘liq masalalarni ko‘rib chiqishda zimmasiga yuklatilgan mas’uliyatli vazifani to‘laqonli bajarmagan.
Yuqorida qayd etilgan holatlar yuzasidan prokuratura tomonidan jinoyat ishi qo‘zg‘atilib, surishtiruv ishlari olib borilayotgani ma’lum qilingan.
Eslatib o‘tamiz, ilgariroq Sputnik O‘zbekiston muxbiri ushbu masala yuzasidan Bosh prokuratura matbuot-xizmati bilan bog‘langanida, prokuratura vakili bu masala bo‘yicha tuman prokuraturasiga murojaat qilish lozimligini ta’kidlagan edi.
