TOShKENT, 16 noya — Sputnik, Dilshoda Rahmatova. Bag‘rikenglik holati Markaziy Osiyo davlatlarida va butun dunyoda O‘zbekistondagi singari bo‘lishini xohlayman, dedi payshanba kuni O‘zbekiston Respublikasi Milliy markazi direktori Akmal Saidov Islom universitetida o‘tkazilgan bag‘rikenglik mavzusiga bag‘ishlangan ilmiy-amaliy konferensiyada.
"1995 yilning 16-noyabr sanasida Parij shahridagi YuNESKO shtab-kvartirasida bo‘lgan bu voqea. O‘zbekistonning Birinchi Prezidenti Islom Abdug‘aniyevich Karimov ushbu deklaratsiya qabul qilinishi tashabbuskorlaridan biri bo‘lganlar. U kishi YuNESKO Ijroiya qo‘mitasida qilgan chiqishi vaqtida: "Nega O‘zbekiston ushbu deklaratsiya qabul qilinishi tashabbuskori bo‘lib chiqmoqda? Chunki O‘zbekiston — tarixan bag‘rikeng davlat. Ko‘p millat va elatli yurtimizda turli diniy konfessiya vakillari ahil-inoq yashab, ular o‘z diniy bayramlari va e’tiqod amallarini emin-erkin ado etmoqda.
O‘zbekiston turfa madaniyatlar va tamaddunlarga hamisha ochiq bo‘lgan. O‘zbekistonda har doim turli tillarda so‘zlashib kelingan.
O‘zbekiston Buyuk Ipak Yo‘li chorrahasida joylashgan va bag‘rikenglik bu davlatga tarixan xos. Bag‘rikenglik — O‘zbekistonning tashrif qog‘ozidir. Shu bois ham bu tashabbusni biz qo‘llab quvvatlaymiz, degan edilar".
O‘zbekiston prezidenti BMT Bosh Assambleyasining 72-sessiyasida ma’rifat va diniy bag‘rikenglik, Markaziy Osiyo bo‘yicha maxsus deklaratsiya hamda Yoshlar huquqi bo‘yicha xalqaro konvensiyalarni qabul qilish borasidagi takliflar bilan chiqqanini eslatib o‘tib, Mirziyoyevning bu tashabbuslari dunyo mamlakatlari rahbarlari va ekspetrlar tomonidan ijobiy qabul qilinganini qo‘shimcha qildi.
"O‘zbekistondagi ayni vaqtdagi bag‘rikenglik holatini avaylash, qadrlash zarur, Markaziy Osiyodagi mamlakatlarda va butun dunyoda bag‘rikenglik holati O‘zbekistonda singari bo‘lishini xohlardim", — dedi o‘z nutqi yakunida Saidov.
