TOShKENT, 24 okt — Sputnik. Joriy yil 24-oktabr kuni 500 ga yaqin fuqarolar bepul tibbiy ko‘rikdan o‘tishi mumkin. Bu haqda Tadbirkorlar va ishbilarmonlar harakati — O‘zbekiston liberal-demokratik partiyasi matbuot xizmati xabar qildi.
Xabarda aytilishicha, Qozon Davlat tibbiyot akademiyasi vrach-onkologi, Yevropa Onkologlar jamiyati ishchi guruhi (ESGO) a’zosi M.S.Katsuba hamda Shvetsiyaning ankodiagnostika yo‘nalishidagi "Fujirebio Diagnostics" kompaniyasi xodimi, biologiya fanlari nomzodi I.A.Silinalar fuqarolarni qabul qilishi kutilmoqda.
Tibbiy ko‘rik yangi uslublardan biri — onkomarkerlar yordamida o‘tkazish rejalashtirilgan.
Eslatib o‘tamiz, joriy yil aprelda prezident Shavkat Mirziyoyev "2017-2021 yillarda O‘zbekiston Respublikasida onkologiya xizmatini yanada rivojlantirish va aholiga onkologik yordam ko‘rsatishni takomillashtirish chora-tadbirlari to‘g‘risida"gi qarorni imzolagandi.
2017-2021 yillarda O‘zbekiston aholisiga onkologik yordam berishni yanada rivojlantirish tadbirlarini amalga oshirishga O‘zbekiston budjeti mablag‘laridan 32,5 milliard so‘m hamda xalqaro moliya institutlarining kredit mablag‘lari va grantlari hisobiga 144,1 million AQSh dollarini yo‘naltirish nazarda tutilgan.
Bu esa 100 ming aholiga onkologik kasalliklardan vafot etish ko‘rsatkichini 38,7 foizdan 35 foizgacha pasaytirish, onkologik kasalliklarga chalingan bemorlarni o‘smaga qarshi preparatlar bilan ta’minlashni 33 foizdan 90 foizgacha ko‘paytirish, aholining davolashning yuqori texnologik turlariga bo‘lgan ehtiyojini qoplashni 70 foizgacha yetkazish imkonini beradi.
