TOShKENT, 9 okt — Sputnik. Amerikalik respublikachi-senator, Xalqaro ishlar bo‘yicha qo‘mita rahbari Bob Korker New York Times nashriga bergan intervyusida AQSh prezidenti Donald Tramp, boshqa davlatlarga tahdid qila turib, mamlakatni "uchinchi jahon urushi yo‘liga" chiqarishi mumkinligini aytdi.
Senatorga ko‘ra, Tramp Twitterdagi yozuvlari orqali ham AQShning diplomatik urinishlariga ko‘plab marotaba ziyon yetkazgan. "Bir necha holatlarda u o‘zining tvitlari bilan bo‘lib o‘tayotgan muzokaralarga zarar yetkazgan", — deb aytgan senator aniq misollarni keltirmagan holda.
Ilgariroq Bob Korker 2018-yilda bo‘lib o‘tadigan saylovlarda uchinchi bor olti yillik muddatga saylanmasligini ma’lum qilgan edi. Donald Tramp Korkerning ushbu qaroridan so‘ng Twitterda saylovlarda ishtirok etish uchun senatorning "ichagi ingichkalik" qilishini yozdi. Oq uy rahbari shuningdek, Davlat kotibi lavozimini so‘ragan Korkerga rad javobini berganligini va uni Eron bilan yadro kelishuvida ayblaganini qo‘shimcha qilgan.
Trampning ushbu xabarlariga javob tarzida Korker o‘z Twitterida Oq uy "kattalar uchun bolalar bog‘chasi"ga aylanganini ma’lum qilgan.
So‘ngi vaqtlarda AQSh va Shimoliy Koreya o‘rtasida keskin bayonotlar "almashuvi" ro‘y bermoqda. Qo‘shma Shtatlar prezidenti BMT minbaridan turib "agar KXDR AQShga tahdid qiladigan bo‘lsa, uni to‘liq yo‘q qilishini" aytib tahdid qildi. Shimoliy Koreya yetakchisi Kim Chen In bunga javoban tarixdagi eng keskin javob choralarini qo‘llashga va’da berdi.
