TOSHKENT, 7 sen — Sputnik. Turkiya prezidentining rafiqasi Emine Erdoʻgʻon Bangladeshdagi "Kutu palon" nomli musulmon-roxinja qochqinlar lageriga tashrif buyurdi. Bu haqda RIA Novosti xabar qildi.
Emine Erdoʻgʻon xalqaro hamjamiyatni Myanmada Rakxayn musulmon aholisiga qarshi zoʻravonliklarni toʻxtatish yuzasidan tegishli choralar koʻrilishiga chaqirdi.
"Rakxaynda farzandlarimiz boʻlmaganligi uchungina u yerda sodir boʻlayotgan zoʻravonliklarga koʻz yumib boʻlmaydi. Sodir boʻlayotgan voqealar uchun javobgarlik barchaning zimmasida. Har bir odam musulmonlar uchun qoʻlidan kelgan yordamini qilsin", — degan Emine Erdoʻgʻonning soʻzlarini keltiradi Anadolu axborot agentligi.
Turkiya prezidenti rafiqasi musulmon-roxinja qochqinlar bilan suhbatlashdi va dunyo hamjamiyatini Myanmada sodir boʻlayotgan zoʻravonliklarga befarq turmaslikka chaqirdi.
"Bu vahshiyliklar hozirgi vaqtda dunyo hamjamiyati koʻz oʻngida sodir etilayotganligiga ishongim kelmayapti. Aybdorlar boʻlsa, ular jazolanishi kerak, aybsiz insonlar oʻrniga" — dedi Turkiya prezidenti turmush oʻrtogʻi.
Eslatib oʻtamiz, Rakxayn shtatida Myanma xavfsizlik kuchlari shu hududda yashovchi musulmonlarga qarshi harbiy operatsiyalarni davom ettirmoqda. Ular kelib chiqishi bangladeshlik boʻlgan shtat ahli bu yerda yashashga haqli emasligini taʼkidlashmoqda.
Hukumat armiyasi hamda musulmon-rohinja vakillari oʻrtasidagi toʻqnashuvlar davom etmoqda. Shu muddat ichida 400 kishi halok boʻldi, bularning 20 nafari mamlakat harbiylari hisoblanadi. Musulmon-rohinja vakillari yana 15 nafar mahalliy butparastlarni oʻldirganlikda ayblanmoqda.
