TOShKEN, 5 avg — Sputnik. 28-30 avgust kunlari Samarqand shahrida "Jahon tamadduni tarixida Markaziy Osiyo renessansi" mavzusida xalqaro konferensiya bo‘lib o‘tadi, deb xabar qilindi O‘zbeston Fanlar Akademiyasi saytida.
Mazkur konferensiya 2014-yil Samarqand shahrida "O‘rta asrlar Sharq allomalari va mutafakkirlarining tarixiy merosi, uning zamonaviy sivilizatsiya rivojidagi roli va ahamiyati" mavzuyida bo‘lib o‘tgan konferensiyaning mantiqiy davomi ekani qayd etilgan.
Ushbu konferensiyada IX-XII asrlarda Markaziy Osiyo Uyg‘onish davrining tarkibiy qismlaridan bo‘lgan islom ilmlari bo‘yicha boy meros ham muhokama qilinadi.
Konferensiya ishida Muhammad al-Xorazmiy, Ahmad al-Farg‘oniy, Abu Rayhon Beruniy, Ibn Sino, Mahmud az-Zamaxshariy, Mirzo Ulug‘bek, Alisher Navoiy va boshqalarning, shuningdek, Imom al-Buxoriy, Burxoniddin Marg‘inoniy, Imom Iso at-Termiziy, Abu Mansur Moturidiy kabi diniy ulamolarning ilmiy merosi tahliliga alohida e’tibor qaratiladi.
Konferensiya ishida YUNESKO, IHT, AYSESKO, IRSIKA kabi nufuzli xalqaro tashkilotlar, diplomatik korpus vakillari, jahonning yirik muzeylari, ilmiy va ta’lim muassasalari vakillarining ishtiroki kutilmoqda.
Konferensiya o‘rta asrlar Markaziy Osiyo olimlarining merosini hamkorlikda o‘rganish shaklida O‘zbekiston va yetakchi xorijlik olimlar o‘rtasida yaqin ilmiy hamkorlikni yo‘lga qo‘yish borasidagi muhim bosqich bo‘lishi qo‘shimcha qilingan.
Rejaga ko‘ra, konferensiya yakunida tezislar to‘plami chop etildi.
