Mirziyoyev mikroGESlarni ishlab chiqarishni ko‘paytirish bo‘yicha tavsiyalar berdi

TOShKENT, 23-iyun — Sputnik. Farg‘ona politexnika instituti viloyatdagi ishlab chiqarish korxonalari bilan hamkorlikda MikroGES ilmiy-ishlab chiqarish korxonasi loyihasini taklif etmoqda, deb xabar qilindi O‘zbekiston prezidenti rasmiy saytida.

MikroGES xalqaro tasnifga asosan quvvati 0,1 kVtdan 100 kVtgacha bo‘lgan gidroenergetik qurilma bo‘lib, u asosan gidroturbina, tasmali va reduktorli uzatmalar hamda asinxron generatordan iborat. MikroGES ekologik tozaligi, oddiyligi, arzonligi, texnologik jihatdan tayyorlash va ekspluatatsiya qilish osonligi bilan ajralib turadi.

Loyihada mikroGESlar ishlab chiqarishni tashkil qilish va hayotga tatbiq etish, Farg‘ona politexnika institutida gidroenergetika sohasi mutaxassislarini tayyorlash ko‘zda tutilgan.

MikroGESning quvvati 50 kVt bo‘lgan 2 tajriba nusxasi institut olimlari tomonidan "Farg‘onaazot" OAJ va Marg‘ilon traktor ta’mirlash korxonasi bilan hamkorlikda Farg‘ona shahridan o‘tuvchi Marg‘ilonsoyga qo‘yilib, tajriba-sinovdan o‘tmoqda. MikroGESlardan olinayotgan elektr energiya shaharning Kashtanzor ko‘chasi, "Marg‘ilonsoy" to‘yxonasi va "Hamkorbank" hududlarini yoritishda ishlatilmoqda.

Farg‘ona viloyati suv xo‘jaligi mutaxassislari bilan birgalikda viloyat hududidan o‘tuvchi soy va kanallarning gidrologik tasniflari o‘rganilib, dastlabki bosqichda 230 joyda quvvati 50 kVtlik mikroGESlar o‘rnatish rejalashtirilgan. Reja amalga oshgach, bir yilda ushbu mikroGESlardan olingan quvvat viloyatda sarflanayotgan elektr energiyaning 2 foizini tashkil etadi. Bu yiliga 17 milliard so‘mlik elektr energiya tejaladi, deganidir.

Mirziyoyev ushbu loyiha ilm-fan yutuqlarini amaliyotga joriy etish borasida olib borilayotgan izlanishlarning yaqqol namunasi ekanini ta’kidlab, mikroGESlarni ishlab chiqarishni ko‘paytirish va boshqa hududlarga ham izchil joriy etish bo‘yicha tavsiyalar berdi.

Bizning Telegramdagi o‘zbekcha kanalimizga obuna bo‘ling va eng yangi xabarlarni birinchi bo‘lib o‘qing.