O‘ho‘: Shimoliy Koreya TIV o‘z rasmiy saytini ishga tushirdi

TOShKENT, 22-iyun — Sputnik. Koreya Xalq Demokratik Respublikasi Tashqi ishlar vazirligi internetda o‘z rasmiy saytini ishga tushirdi, deb xabar qildi RIA Novosti.

Sayt yaratilgani haqidagi qisqa xabar Koreya Markaziy telegraf agentligi tomonidan e’lon qilindi. Agentlik xabariga ko‘ra, KXDR TIV sayti mamlakat tashqi siyosati mohiyatini anglashda yordam berishga qaratilgan. Shu bilan birga sayt "Koreya va dunyo mamlakatlari o‘rtasidagi o‘zaro tushunish, do‘stlik va hamkorlik munosabatlarini mustaqillik, tinchlik va do‘stlik ideallari asosida rivojlantirishga va kengaytirishga hissa qo‘shishi" qo‘shimcha qilingan.

Saytda ushbu muassasa tarkibiy tuzilmalari, departamentlarning to‘liq ro‘yxati, institutlar va muassasa boshqaruvida bo‘lgan tashkilotlar haqida koreys va ingliz tillarida batafsil ma’lumot berilgan.

Shimoliy Koreya singari yopiq davlat uchun ushbu saytda TIV ba’zi institutlarining elektron manzillari va pochta manzillari ommaga e’lon qilingani ham ajablanarli holdir.

Shimoliy Koreya TIV saytidagi bo‘linmalarda so‘nggi yangiliklar, hujjatlar keltirilgan, mamlakat diplomatik yo‘nalishi haqida tushuntirish berilgan, KXDR haqida ma’lumot ham kiritilgan. Shuningdek, sayt foto va videomateriallar bilan to‘ldirilgan.

Saytda shuningdek, izlash tizimi ham mavjud.

Shimoliy Koreyada faqatgina rasman bunga ruxsat olgan qator tashkilotlar Internetga ulanish imkoniyatiga ega. Shuning uchun TIV tomonidan yaratilgan rasmiy sayt chet ellik fuqarolar va mamlakatdan tashqarida yashayotgan koreyaliklar foydalanishlari uchun mo‘ljallangan.

Bizning Telegramdagi o‘zbekcha kanalimizga obuna bo‘ling va eng yangi xabarlarni birinchi bo‘lib o‘qing.