TOSHKENT, 28 may — Sputnik. Shimoliy Koreya yetakchisi Kim Chen Inning 1998 yildan beri AQShda yashovchi xolasi va nihoyat uzoq yillardan soʻng jurnalistlarga intervyu berdi, deb xabar qilmoqda RIA Novosti nashri.
Ko Yen Sukning tasdiqlashicha, Kim Chen In rostdan ham 1984 yilda tugʻilgan. Chunki uning oʻgʻli ham shu yil tugʻilgan boʻlib, ular bolalikda birga oʻynashgan.
"Biz yaxshi bir uyda yashardik, oilamiz binoyidek edi. Men Kim Chen In va uning akasi Kim Chen Chxolyuga xuddi onasidek edim. Kim Chen Inga doʻstlarini uyga boshlab kelishni va mehmon qilishni tavsiya etardim. Uni yaxshi hayotda yashashini istardim. Ular shirinliklar yer va “Lego” oʻynashardi», — deb iqtibos keltiradi Ko Yen Suk intervyusidan nashr.
Ayolning qoʻshimcha qilishicha, u bolalar bilan birga Parijdagi Disneylendga borgan. Bundan tashqari, Shimoliy Koreya yetakchisi Alplarda changʻi uchgan, Frantsiyaning Rivyerasida dam olgan, italyan restoranlarida ovqatlangan. Kim Chen In yoshligida texnikaga juda qiziqqan va hamisha "nima uchun kemalar suzadi, samolyotlar uchadi" degan savolga javob olishga uringan. Bundan tashqari maktabda tahsil olgan vaqtlarida basketbol oʻyiga koʻngil qoʻygan va keyinchalik afsonaviy Maykl Jordanga muxlislik qilgan. Yoz oylarini Kim Chen In ona shahrida oʻtkazgan, deb yoziladi maqolada.
"Kim Chen In bezori emasdi, ammo u juda qiziqqon edi, unga sabr yetishmasdi. Onasi uning oʻyinga haddan berilib, oʻqishga yetarli vaqt ajratmayotganini aytib, koyigan vaqtlarida, u gap qaytarmasdi, balki boshqacha usullar bilan oʻz noroziligini bildirar edi, misol uchun ochlik eʼlon qilardi", — deya xotirlaydi Ko Yen Suk.
Ayolning taʼbiriga qaraganda, Kim Chen Inni "yoshligidan shunday tarbiyalashganki, u bir kun kelib hukmdorga aylanishini bilgan", deb taʼkidlanadi nashrda. Shimoliy Koreyaning boʻlgʻusi rahbari sakkiz yoshga toʻlganida, uning tugʻilgan kuniga oliy qoʻmondonlik boshqaruvi vakillari kelishgan. Kim Chen Inga "haqiqiy generallar unga general formasini sovgʻa qilishgan va taʼzim bajo keltirishgan, oʻsha vaqtlardan buyon oʻsha generallar Kim Chen Inga sodiq", deb yozadi nashr Ko Yen Sukning hikoyasiga asoslangan holda.
