TOShKENT, 7-iyun — Sputnik. O‘zbekistonda uch nafar ekstremist ustidan sud hukmi o‘qildi. Ular respublika hududida shariat qonunlari asosida yashovchi teokratik asosda tuzilgan davlatni qurishni rejalashtirgan.
O‘zbekistonliklar internet tarmog‘ida "O‘zbekiston Islomiy Harakati" terrorchilik tashkiloti asoschisi Tohir Yo‘ldoshev va boshqa ta’qiqlangan diniy-ekstremistik tashkilotlar rahbarlariga tegishli tashviqot materiallarini o‘rganib, yuklab olganlar. Ular shuningdek, "Odnoklassniki" ijtimoiy tarmog‘ida bir nechta soxta akkauntlarni ro‘yxatdan o‘tkazgan va ular orqali diniy ekstremizm g‘oyalarini targ‘ib qiluvchi hamda radikal Islom qonunlari asosida yashashga chaqiruvchi materiallarni joylaganlar.
"MXX xodimlari tomonidan o‘tkazilgan tezkor-qidiruv tadbirlari natijasida bu shaxslar tomonidan sodir etilgan noqonuniy hatti-harakatlarning oldi olindi. Ekspertlar xulosasiga ko‘ra, olib qo‘yilgan materiallar diniy fundamentalizm g‘oyalarini o‘z ichiga singdirgan, jamoatchilik xavfsizligiga rahna solgan va O‘zbekistonda halifatlik barpo etishga qaratilgan bo‘lgan", — deb ta’kidladi sud instansiyasi vakili.
Sud Hasan Absalamovni 7-yilga ozodlikdan mahrum qildi. Uning ukasi Husan Absalamov va sheriklari Temurbek Axmatovlar har biri 5-yildan qamoq jazosiga mahkum etildilar.
Bizning Telegramdagi o‘zbekcha kanalimizga obuna bo‘ling va eng yangi xabarlarni birinchi bo‘lib o‘qing.
