Toshkentda Markaziy Osiyodagi eng katta istirohat bog‘i quriladi

TOShKENT, 10 dek — Sputnik. Toshkentda dunyodagi eng mashhur “Disneylend”dan qolishmaydigan Markaziy Osiyodagi eng katta bog‘ quriladi, deb xabar qilmoqda "Darakchi" nashri.

Xabarda O‘zbekiston Respublikasi Prezidenti etib saylangan Shavkat Mirziyoyev Toshkent shahri saylovchilari bilan uchrashuvdagi nutqida Poytaxt aholisi tomonidan shaharda madaniyat va istirohat bog‘lari yetarli emasligi haqida ko‘plab e’tirozlar bildirilayotganligini aytib o‘tgani ta’kidlangan.

"Bu boradagi ishlarni yaxshilash maqsadida maxsus dastur ishlab chiqildi. Unga ko‘ra, 2017-yilda Toshkent shahrida 8 ta yangi madaniyat va istirohat bog‘i barpo etiladi. Ularni joylashtirish  uchun Mirzo Ulug‘bek, Mirobod, Uchtepa, Sirg‘ali, Chilonzor, Shayxontohur va Yashnobod tumanlarida tegishli yer maydonlari ajratib qo‘yildi", — deb yozadi nashr.

Bundan tashqari, nashrga ko‘ra, Bektemir tumanida, Chirchiq darosi qirg‘og‘ida 70 gektar maydonda umumiy qiymati 80 million $ bo‘lgan, dunyodagi eng mashhur "Disneylend" parklaridan qolishmaydigan Markaziy Osiyodagi eng katta zamonaviy attraksionlar bog‘i quriladi. Hozirgi paytda mazkur loyihani amalga oshirish yuzasidan Yevropaning yetakchi park operatorlari bilan muzokaralar olib borilmoqda.