Samarqandda korrupsiyaning oldini olish masalalariga bag‘ishlangan seminar o‘tkazildi

TOShKENT, 15 noya — Sputnik. Samarqand shahrida korrupsiya holatlarining oldini olish bo‘yicha fuqarolar xabardorligi va huquqiy ongini oshirish masalalariga bag‘ishlangan seminar-trening bo‘lib o‘tdi, deb xabar bermoqda Samarqand shahri hokimligi matbuot-xizmati.

Xabarda aytilishicha, O‘zbekiston Mustaqil bosma ommaviy axborot vositalari va axborot agentliklarini qo‘llab-quvvatlash va rivojlantirish jamoat fondihamda Jurnalistlarni qayta tayyorlash markazi hamkorligida tashkil etilgan tadbirda viloyat ommaviy axborot vositalari hamda nodavlat notijorat tashkiloti vakillari ishtirok etgan.

"Seminar avvalida ishtirokchilarga viloyat prokuratura hamda adliya xodimlari tomonidan korrupsiya turlari va qonunchilik meyorlari, korrupsiya holatlariga qarshi kurashishga doir amaliy usullar, korrupsiyaning fuqarolarga iqtisodiy zarari kabi mavzularda ma’lumot berildi. Shuningdek, mazkur illatga qarshi kurashda muhim omil bo‘lgan jamoatchilik nazoratini amalga oshirishda OAV va NNT hamda davlat organlari vakillari o‘rtasida ijtimoiy sheriklikni o‘rnatish masalalari amaliy mashg‘ulotlar orqali tushuntirildi", — deyiladi xabar matnida.

"Global muammolardan biri sanalgan korrupsiya fuqarolarning ijtimoiy adolatga nisbatan ishonchini keskin pasaytiradi, – deydi "Xalq so‘zi" gazetasining bo‘lim boshlig‘i Q.Xidirov. – Mazkur muammoga qarshi qator xalqaro hujjatlar kuchga kirgan, o‘z navbatida ular mamlakatimizda ham ratifikatsiya qilingan.

Shuningdek, hukumatimizning bu borada qator meyo’riy hujjatlari amalda. Korrupsiyaning oldini olishda jamoat tashkilotlari bilan bir qatorda ommaviy axborot vositalarining ham alohida o‘rni mavjud. Bu esa ularning huquqiy mavzuni yoritishda qonunchilikdan xabardorlik, huquqiy terminlarni o‘z o‘rnida ishlatish, korrupsiyaning fojiali oqibatlari haqida ta’sirchan materiallar tayyorlash kabi ko‘nikmalarni shakllantirishni taqozo qiladi".