TOShKENT, 20 okt — Sputnik. O‘zbekiston Respublikasi Davlat bojxona qo‘mitasida bojxona organlari tomonidan internet tarmog‘i orqali ko‘rsatilayotgan interaktiv xizmatlarga bag‘ishlangan videokonferensiya o‘tkazildi, deb xabar qilmoqda "Jahon" AA.
"Qo‘mitada "Bojxona posti – hududiy bojxona boshqarmasi – Davlat bojxona qo‘mitasi" halqasi bo‘yicha axborotlarni real vaqt miqyosida yig‘ish, nazorat va tahlil qilish, qayta ishlashga mo‘ljallangan bir qator tizimlar ishlab chiqilib, amaliyotga joriy etilmoqda", — deyiladi xabarda.
"Bugungi kunda bojxona organlari faoliyatiga 35 avtomatlashtirilgan axborot tizimi joriy qilingan bo‘lib, shundan 22 tasi davlat axborot tizimi sifatida ro‘yxatdan o‘tgan, – deydi Davlat bojxona qo‘mitasi boshqarma boshlig‘i Abdusobir Saidov. – Tadbirkorlik subektlariga bojxona rasmiylashtiruviga doir qator yengillik va qulayliklar yaratish maqsadida qo‘mita veb-saytida hamda Yagona interaktiv davlat xizmatlari portalida 16 turdagi interaktiv xizmat ko‘rsatilmoqda".
Tadbirkorlik faoliyati subektlari tomonidan tashqi savdo kontraktlari bo‘yicha ma’lumotlarni elektron shaklda taqdim qilish interaktiv xizmatida tadbirkorlar shartnoma va boshqa tegishli hujjatlarni bojxona postiga elektron shaklda taqdim qilmoqda. 2015-yilda jami shartnomalarning 99,9 foizi va ularga qo‘shimcha bitimlar elektron shaklda ro‘yxatdan o‘tkazilgan.
Tadbirda O‘zbekiston Respublikasi Prezidenti vazifasini bajaruvchi Shavkat Mirziyoyev 2016-yil 5-oktabrda imzolagan "Tadbirkorlik faoliyatining jadal rivojlanishini ta’minlashga, xususiy mulkni har tomonlama himoya qilishga va ishbilarmonlik muhitini sifat jihatdan yaxshilashga doir qo‘shimcha chora-tadbirlar to‘g‘risida"gi farmonning ijrosi yuzasidan bojxona organlari zimmasiga yuklangan vazifa va topshiriqlar xususida so‘z yuritildi.
Tadbirda bu yo‘nalishda amalga oshirilishi kutilayotgan reja va loyihalar yuzasidan axborotlar berildi.
