Britaniya generali yil davomida Rossiya bilan yadro urushi boshlanishi haqida bayonot berdi

TOShKENT, 18-may — Sputnik. Britaniya generali ser Richard Shirreff bayonotiga ko‘ra, NATO va Rossiya o‘rtasida yil davomida yadro urushi ro‘y berishi mumkin. RIA Novosti xabari asosida.

General fikriga ko‘ra, Estoniya, Litva yoki Latviya "hujum" nishoniga aylanishi "ehtimoli yuqori", shu bois, G‘arb imkon qadar tezroq "yuz berishi mumkin bo‘lgan fojianing oldini olmog‘i shart". General ikki o‘rtada yadro urushi yuz beradi, degan fikrni ilgari surmoqda. "Negaki, yadro urushi Rossiya harbiy doktrinasi asosi etib belgilangan", — deya ta’kidladi u.

Shirreff, shuningdek, Rossiya NATOning ojiz tomonlarini biladi, shu tufayli u o‘z hujumi sababini Boltiqbo‘yidagi "rusiyzabon xalqlarni himoya qilish" sifatida ifodalashi mumkin, deb ta’kidladi.

Richard Shirreff 2011-2014 yy Yevropadagi NATO Birlashgan Qurolli kuchlari Bosh qo‘mondoni o‘rinbosari lavozimini egallagan. Shu haftada, uning "2017: Rossiya bilan urush" nomli kitobi dunyo yuzini ko‘rdi. Asardagi voqealar — badiiy to‘qima, ammo muallifning aytishicha, ular "real hayotda ro‘y berishi mumkin".

G‘arb vakillari Rossiya tomonidan bo‘ladigan xatarlar haqida birinchi marta ogohlantirayotgani yo‘q. Alyans mana shu tufayli Sharqiy Yevropada o‘z harbiy kuchlari sonini oshirmoqda: may oyi oxirida Pentagon NATO Boltiqbo‘yi mamlakatlari hamda Polshada o‘zining to‘rtta batalonini joylashtirishini ma’lum qilgan edi.

Rossiya hukumati esa Moskva ikki o‘rtada qarama-qarshilikni vujudga keltirish tarafdori emasligini, ammo, G‘arb tomonidan amalga oshiriladigan dushmanchilik harakatlariga munosib javob qaytarishga tayyorligini bildirgan.