TOShKENT, 25-iyul — Sputnik. Viloyat Matbuot uyida Bosh prokuratura huzuridagi Majburiy ijro burosi viloyat boshqarmasi faoliyatiga bag‘ishlangan anjuman o‘tkazildi, deb xabar qildi Samarqand viloyati hokimligi matbuot-xizmati.
MIB boshqarma boshlig‘ining birinchi o‘rinbosari Akmal Imomov jurnalistlarga yangi tizimning maqsad va vazifalari, bugungi kungacha bajarilgan ishlar haqida so‘zlab berdi.
"Viloyatdagi jami shtat birliklari 800 nafardan ortiq kishini, davlat ijrochilari 129 nafarni, nazoratchilar esa 457 nafarni tashkil etadi. Ayni paytda viloyatdagi 1300 nafardan ortiq elektr energiyasi va tabiiy gaz ta’minoti inspektorlari o‘rniga boshqarma tarkibidagi yuqoridagi 457 nafar nazoratchilar faoliyat yuritishadi. Ya’ni, sohaga zamonaviy texnologiyalar kiritilishi kengaytirilib, inson omili kamaygani hisobiga shtatlar uch baravarga qisqardi.
Bugungi kungacha viloyat bo‘yicha barcha qarzdor iste’molchilarning ro‘yxati shakllantirilgan bo‘lib, ularning 70 mingtasiga hozirgacha qarzni uzish bo‘yicha talabnoma yuborilgan. To‘lovlarni o‘z vaqtida amalga oshirmagan 422 ta iste’molchi tarmoqdan uzib qo‘yilgan.
