TOShKENT, 26 fev — Sputnik. Shavkat Mirziyoyevning 2016-yil 21-oktabrdagi "2017-2021-yillarda qishloq joylarda yangilangan namunaviy loyihalar bo‘yicha arzon uy-joylar qurish dasturi to‘g‘risida"gi qaroriga muvofiq Yakka yog‘och massivida yer uchastkasi 2 sotix bo‘lgan uch xonali uylar qurildi, deb xabar qiladi "Jahon" AA.
Bu uylarning foydalanish maydoni 63,5 kvadrat metr bo‘lib, unda ikkita yotoqxona, mehmonxona, oshxona, yuvinish xonalari va qozonxona mavjud. Hovlisida xo‘jalik binolari qurilgan.
"O‘z uy-joyiga ega bo‘lish har bir inson hayotida qanchalik muhim ekanini barchamiz yaxshi bilamiz, — dedi Mirziyoyev. Xalqimiz uyi borning o‘yi yo‘q, deb bekorga aytmagan. Buning chuqur ma’nosi bor. Bunday uy-joylar taqsimotida xalqimizga xos haqiqat va adolat mezonlariga qat’iy rioya etilishi kerak".
Qurilish materiallarining tannarxini kamaytirish hisobiga uylarning narxini yanada arzonlashtirish, tashqi injenerlik tarmoqlari – ichimlik suvi, ichki yo‘llar, elektr energiyasi va tabiiy gaz bilan ta’minlash, atroflarini obodonlashtirish bo‘yicha zarur ko‘rsatmalar berildi.
Prezident yangi uy sohiblaridan biri Alisher Ahmedov xonadonida bo‘lib, bu yerda yashash uchun yaratilgan qulay sharoitlar bilan tanishdi, dildan suhbatlashdi. Yosh oila a’zolari O‘zbekiston prezidentiga e’tibori va g‘amxo‘rligi uchun samimiy minnatdorlik bildirdi.
Shavkat Mirziyoyev shuningdek, Mirmiron massividagi yangilangan namunaviy loyihalar asosida qurilgan uylarda istiqomat qiluvchi aholi uchun issiqxona tashkil etish loyihasi bilan tanishdi.
Prezident bunday issiqxonalarni qurish va ulardan foydalanishda zamonaviy texnologiyalarni qo‘llash, ishga malakali mutaxassislar bilan birga kollej bitiruvchilarini ham keng jalb etish borasida zarur ko‘rsatmalar berdi, deb yozadi nashr.
