Sitora Farmonova "KVN"da o‘zbek millati ustidan kulgan

TOShKENT, 21-iyul — Sputnik. Xonanda Sitora Farmonovaning litsenziyadan mahrum etilgani ijtimoiy tarmoqlarda eng keng muhokama qilinayotgan mavzulardan biriga aylandi, deyish mumkin.

19 iyul kuni "O‘zbeknavo" estrada birlashmasi Sitora Farmonova, Sarvar Azimov va Komil Fozilovlar "litsenziya bitimidagi talab va shartlarni muntazam buzib kelgani uchun" ularni litsenziyalaridan mahrum qilgani haqida ma’lum qilgan edi.

"O‘zbeknavo" tomonidan e’lon qilingan rasmiy bildirishda “O‘zbekiston Respublikasi qonunlari va Vazirlar Mahkamasi qarorlari talabini bajarish har bir xonanda va san’atkorning burchidir”, deyilgan edi.

Xonanda bitimdagi aynan qaysi talablarni buzganligi haqida esa "O‘zbeknavo" matbuot-xizmati aytib o‘tmagan.

Ijtimoiy tarmoqlarda estrada yulduziga muxlislik qilganlarning yozishiga ko‘ra, Sitora "KVN"da o‘zbek millati ustidan kulganligi bois litsenziyadan mahrum qilingan.

Darakchi nashrida berilgan ma’lumotlarga ko‘ra, Rossiya telekanallarining birida efirga uzatilgan “KVN” ko‘rsatuvida aktrisa va xonanda Sitora Farmonova Qirg‘iziston Respublikasining jamoasi nomidan ishtirok etgan. Uning chiqishida jamoa uni “o‘zbekistonlik aktrisa Yevropaga o‘ziga er qidirib kelgan. Uni bunga o‘zbek eri majbur qildi” qabilida hazil qilgan.

Sputnik O‘zbekiston xonanda bilan bog‘lanishga urinib ko‘rdi, ammo Sitora Farmonovaning telefoni o‘chirilgan edi.

Xonandaning produseriga qo‘ng‘iroq qilganimizda, u bizga Sitora hozirda Toshkentga "O‘zbeknavo" estrada birlashmasiga borib, litsenziya bilan bog‘liq shov-shuvlarga shaxsan oydinlik kiritish niyatida ekanligini ma’lum qildi.

Sal oldin Sputnik Qirg‘iziston Sitora Farmonova bilan bog‘lanishga muvaffaq bo‘lgani haqida yozgan edi. Nashrda berilgan xabarga ko‘ra, Sitora Farmonova Sputnik Qirg‘iziston muxbiriga "Tafsilotlardan xabarim yo‘q. Barcha tashkiliy ishlar bilan produserim shug‘ullanadi. Litsenziyamdan mahrum etilganimni eshitib, o‘zim ham "shok"ka tushdim. Hozircha bu borada hech qanday izoh berolmayman", deb aytgan.