TOShKENT, 29 apr — Sputnik. Markaziy bank boshqaruvi 29-apreldagi yig‘ilishida asosiy stavkani yillik 14 foiz darajasida saqlab qoldi.
Regulyator ma’lumotiga ko‘ra, mart oyida yillik inflyatsiya 7,1 foizgacha pasaydi. Oziq-ovqat va energiya kabi tez o‘zgaruvchi narxlar hisobga olinmaydigan bazaviy inflyatsiya esa 5,7 foizni tashkil etdi.
Yangilangan prognozlarga ko‘ra, 2026-yil yakunida umumiy inflyatsiya 6,5 foiz atrofida shakllanishi kutilmoqda. Shu bilan birga, narxlar barqarorlashuvi sekinlashayotgani va tashqi xatarlar kuchayayotgani qayd etildi.
Xususan, geosiyosiy ziddiyatlar fonida jahon bozorida neft va oziq-ovqat narxlari oshishi xavfi bor. Tashish xarajatlarining ko‘payishi ham import narxlari orqali O‘zbekistondagi inflyatsiyaga qo‘shimcha bosim qilishi mumkin.
Markaziy bank ichki bozorda ham narxlarga ta’sir qiluvchi omillar borligini qayd etdi. Birinchi chorakda mamlakat yalpi ichki mahsuloti real hisobda 8,7 foizga o‘sdi. Xizmatlar, qurilish va savdo sohalaridagi faollik oshgani iqtisodiyotda talab yuqori saqlanayotganini ko‘rsatmoqda.
Shu sababli 2026-yil uchun iqtisodiy o‘sish prognozlari 7–7,5 foizgacha oshirildi.
Shu bilan birga, asosiy savdo hamkor davlatlar valyutalarining mustahkamlanayotgani, oltin narxi yuqori darajada saqlanayotgani, eksport tushumlari va pul o‘tkazmalarining barqaror o‘sishi ichki valyuta bozoridagi taklifni qo‘llab-quvvatlamoqda.
Regulyator inflyatsiyani 5 foizlik maqsadli darajagacha pasaytirish uchun qat’iy pul-kredit sharoitlarini saqlab qolish zarur deb hisoblamoqda. Agar inflyatsiyaga oshiruvchi omillar kuchaysa, Markaziy bank pul-kredit sharoitlarining yetarli darajada qat’iyligini ta’minlashini bildirdi.