TOShKENT, 12 apr — Sputnik. Rossiya va Ukraina o‘rtasidagi hududiy ixtiloflar sanoqli kilometrlarga borib taqaladi. Bu haqda Rossiya prezidening matbuot kotibi Dmitriy Peskov “Vesti” jurnalisti Pavel Zarubinga bergan intervyusida ma’lum qildi.
Uning so‘zlariga ko‘ra, Rossiya qo‘shinlariga Donesk Xalq Respublikasining yana taxminan 17–18 foizini egallash qolgan va bu ma’muriy chegaralarga chiqishni anglatadi.
Shuningdek, Dmitriy Peskovning aytishicha, maxsus harbiy operatsiya Pasxa sulhi muddati tugagandan so‘ng ham davom etadi va Ukrainadagi mojaro faqat Vladimir Zelenskiy “tegishli qarorlar”ni qabul qilgan taqdirdagina tinch yo‘nalishga o‘tishi mumkin.
“Rossiya muvaqqat sulhni emas, balki mustahkam va barqaror tinchlikni istaydi. Bunday tinchlik bugunning o‘zida ham boshlanishi mumkin”, — dedi Peskov “Vesti” muxbiri Pavel Zarubinga bergan intervyusida.
Shu bilan birga, Peskov Pasxa sulhini Rossiya prezidenti Vladimir Putin tomonidan qabul qilingan gumanitar xususiyatga ega qaror deb atadi. Uning ta’kidlashicha, bu qadam pravoslav Pasxa bayrami munosabati bilan qabul qilingan, ammo Rossiya harbiylari ehtimoliy provokatsiyalarga tayyor turishi kerak.
Peskov yana bir muhim jihatga e’tibor qaratdi: uning aytishicha, hatto Rossiya qo‘shinlari Donbassning ma’muriy chegaralariga chiqqan taqdirda ham, muzokaralar bosqichi oson kechmaydi. Kreml vakilining fikricha, bunday muzokaralar juda murakkab, sinchiklab olib boriladigan va tez yakunlanmaydigan jarayon bo‘ladi.