TOShKENT, 21 okt – Sputnik. Surxondaryo viloyati hokimi Ulug‘bek Qosimov “GlokalEuroasia” kompaniyasi rahbari Iqbol Muhammad bilan uchrashuv o‘tkazdi. Uchrashuv chog‘ida hududning ijtimoiy-iqtisodiy rivojlanishiga xizmat qiladigan yangi kelishuvlarga erishildi, deb xabar berdi “Dunyo” axborot agentligi.
“GlokalEuroasia” Uzun tumanida mis qazib olish va qayta ishlash bo‘yicha 650 million dollarlik yirik loyiha amalga oshirishni rejalashtirmoqda. Loyiha doirasida har yili 10 ming tonna mis qazib oladigan va qayta ishlaydigan korxona tashkil etiladi.
Hududda geologiya-qidiruv ishlarining dastlabki ikki bosqichi muvaffaqiyatli yakunlangan. Loyiha amalga oshirilgandan so‘ng 350 ta yangi ish o‘rni yaratilishi kutilmoqda.
Shuningdek, hindistonlik hamkorlar viloyatda oliy ta’lim va sog‘liqni saqlash sohalarida qo‘shma loyihalarni yo‘lga qo‘yish niyatini bildirdi. Ular mintaqada xalqaro ta’lim standartlarini joriy etish va xorijiy talabalarni jalb qilishga qiziqish bildirdi.
“GlokalEuroasia” tog‘-kon sanoati, ta’lim va tibbiyot sohalarida yirik xalqaro loyihalarni amalga oshirish tajribasiga ega kompaniya hisoblanadi.