TOShKENT, 4-mart — Sputnik. Hindistondan O‘zbekiston orqali Qozog‘istonga birinchi konteyner poyezdi yo‘lga qo‘yildi, deya xabar berdi "O‘ztemiryo‘lkonteyner" AJ matbuot xizmati.
“Transport yo‘laklarini kengaytirish va xalqaro yuk tashishlarni rivojlantirish doirasida "O‘ztemiryo‘lkonteyner" AJ, "TULM" OAJ va "Kedentransservis" AJ hamkorligida Hindistondan Qozog‘istonga birinchi konteyner poyezdi yo‘lga qo‘yildi”, — deyiladi xabarda.
Tarkibida 12 ta yigirma futlik konteyner bo‘lgan poyezd Hindistonning Mundra portidan Qozog‘istonning Sorokovaya stansiyasiga Hindiston-Eron-Turkmaniston-O‘zbekiston-Qozog‘iston yo‘nalishida harakatlanib, 1 585 km dengiz orqali va 4 300 km temir yo‘l orqali bosib o‘tadi.
O‘tgan yilda ushbu yo‘nalish bo‘ylab Hindistondan O‘zbekistonga (Mundra – Sergeli) 20 ta yigirma futlik konteyner tashuvlari muvaffaqiyatli amalga oshirilgan edi.
"O‘ztemiryo‘lkonteyner" boshqaruv raisining ta’kidlashicha, kompaniya Hindiston – Markaziy Osiyo multimodal yo‘nalishida muntazam konteyner poyezdlarini yo‘lga qo‘yishni rejalashtirgan.
Aytilishicha, bu o‘z navbatida savdo aloqalarini mustahkamlash hamda eksportor va importorlar uchun yangi imkoniyatlar yaratishga xizmat qiladi.