TOShKENT, 30 apr — Sputnik. Bugun O‘zbekistonning Hindistondagi elchixonasida mahalliy vaqt bilan soat 08:00 da (Toshkent vaqti bilan 07:30) O‘zbekiston madhiyasi yangradi. Bu haqda “Dunyo” axborot agentligi xabar berdi.
Ta’kidlanishicha, Hindistonda vaqtincha istiqomat qilayotgan O‘zbekiston fuqarolari referendumda qatnashish konstitutsiyaviy huquqidan foydalanish maqsadida diplomatik vakolatxonada tashkil etilgan 51-referendum uchastkasiga kela boshladi.
“Elchixona xodimlari va Hindistonda vaqtincha bo‘lib turgan yurtdoshlarimiz vakillaridan iborat referendum o‘tkazish bo‘yicha uchastka komissiyasi bugungi muhim tadbirga puxta tayyorgarlik ko‘rdi”, – deydi O‘zbekiston elchisi Dilshod Axatov.
Diplomatik missiyada 51-referendum uchastkasida ovoz berish jarayoni davom etmoqda.
Bugun O‘zbekiston Konstitutsiyaga o‘zgartirishlar kiritish bo‘yicha referendumda ovoz berish jarayonlari o‘tkazilmoqda. Respublika bo‘yicha tashkil etilgan jami 10758 ta referendum uchastkasi soat 08:00 da ochildi.