TOShKENT, 22 avg — Sputnik. Tashqi siyosiy vaziyat tufayli Germaniyaning Toshkentdagi elchixonasi viza bo‘limi noma’lum vaqtga yopiladi. Bu haqda elchixona matbuot xizmati xabar berdi.
Ta’kidlanishicha, viza olish uchun tayinlangan uchrashuvlar bekor qilinadi.
“Yangi vizaga yozilish vaqtlari hamda viza olish uchun uchrashuvlar haqida kerakli vaqtda xabar beriladi. So‘rovnomalaringizni yubormasligingizni iltimos qilamiz. Bu boradagi savollar hozircha javobsiz qoladi”, -deyilgan xabarda.
Hozirda Germaniya o‘z fuqarolari va afg‘on qochoqlarini Kobuldan O‘zbekiston orqali evakuatsiya qilishni davom ettirmoqda. 19-avgustdan Toshkent aeroporti terminali Germaniya, Afg‘oniston va YeI davlatlari fuqarolarini mamlakat orqali evakuatsiya qilinishi uchun ajratilgan edi.
So‘nggi bir necha kun ichida O‘zbekiston hududidan 1982 nafar chet el fuqarolarining evakuatsiyasi ta’minlangan.