TOShKENT, 23 mar — Sputnik. Sud majlisi davomida sobiq prezident Almazbek Atambayevning sog‘ligi yomonlashgan va natijada sud jarayoni keyinga qoldirilgan, deb xabar qildi Sputnik Qirg‘iziston advokat Zamir Jooshevga tayangan holda.
"Sud ertalab boshlandi. Majlis tushlik uchun tanaffusga to‘xtatilganida, Atambayevni qo‘riqchilar olib ketdi. Ular Atambayevning sog‘ligi yomonlashganini aytishdi. Atambayev qon bosimidan shikoyat qilmoqda", - dedi u.
Atambayevning advokati shuningdek, sudga GNKB SIZOsi tibbiy-sanitar xizmati tomonidan himoyasidagi shaxsning sog‘ligi yomonlashgani haqidagi aktni taqdim etgan.
Keyingi sud majlisi 30-martga qoldirilgan.
Ta’kidlash joizki, bu Koy-Toshdagi voqealar yuzasidan o‘tkazilayotgan birinchi sud majlisi edi.
Eslatib o‘tamiz, o‘tgan yilning 7-8 avgust kunlari Qirg‘iziston maxsus xizmatlari sobiq prezidentning tarafdorlariga nisbatan maxsus vositalarni qo‘llagan edi.
O‘shanda Atambayevning tarafdorlari spesnazga javoban o‘t ochgan va shu bois, birinchi kuni sobiq prezidentni qo‘lga olishning imkoni bo‘lmagan. Atambayevning tarafdorlari olti nafar spesnaz jangchilarini asir olgan.
Ertasi kuni tarafdorlar va kuch tuzilmasi vakillari o‘rtasida yana to‘qnashuv yuz bergan va jang ertalabgacha davom etgan. Natijada, Atambayevning o‘zi kuch tuzilmalariga taslim bo‘lgan.
Qirg‘iziston parlamenti Atambayevni avgust oyidagi tartibsizliklar uchun javobgar, deb topgan.
To‘qnashuvlar vaqtida 136 kishi jarohatlangan va bir nafar spesnaz xodimi halok bo‘lgan.