TOShKENT, 23 fev — Sputnik. Xorazm viloyatida Xavfsiz turizmni ta’minlash boshqarmasi tomonidan tajriba tariqasida otliq posbonlar faoliyati yo‘lga qo‘yildi. Shuningdek, ayni vaqtda jamoat tartibini saqlash va jamoat tartibini ta’minlash maqsadida "Ezgulik patruli" guruhlari faoliyati ham o‘z ishini boshladi, deb xabar qildi Sputnik O‘zbekiston muxbiriga Xorazm viloyati hokimligining turizm masalalari bo‘yicha shug‘ullanuvchi mutasaddi xodimi.
Xususan, patrulda xizmat qiluvchi qizlar tibbiy malakaga ega bo‘lib, maxsus aptechka bilan ta’minlangan. Ular jamoat joylarida o‘zini yomon his qilib qolgan fuqarolarga tez tibbiy yordam ko‘rsatishlari aytilmoqda.
"Ezgulik patruli" xizmati yigitlari esa maxsus tayyorgarlikdan o‘tgan sportchilar, dedi suhbatdosh.
Ular qo‘l-kishani bilan ta’minlangan va biror huquqbuzarlik sodir etilgan taqdirda, darhol chora ko‘rish huquqiga ega. Shuningdek, ezgulik patruli xizmati xodimlari keksa kishilarga og‘ir sumkalarini ko‘tarishda yordam berish singari ezgu amallarni ham bajarishlari aytilmoqda.
Xavfsiz turizmni ta’minlash bo‘yicha maxsus otliq xodimlar esa Ichan-Qal’a atrofida aylanib yurishadi.
Shuningdek, sayyohlarga yo‘nalish ko‘rsatish, ularni tarixiy obidalar bilan tanishtirish, mehmonxonalar manzillarini ko‘rsatish singari vazifalarni ham bajaradilar.
Viloyatda yo‘l harakati xavfsizligi bo‘yicha nazorat motosiklli posbonlar tomonidan amalga oshiriladi.
"Xorazmda joriy etilgan ushbu yangi tizim sayyohlar va fuqarolar xavfsizligini ta’minlash uchun xorijiy mamlakatlarda yo‘lga qo‘yilgan tizimdan mutlaqo farq qiladi va keyinchalik bu xizmat turlarini viloyatning odamlar gavjum bo‘ladigan hududlarida ham joriy etish ko‘zda tutilgan", deb suhbatga yakun yasadi suhbatdosh.
Eslatib o‘tamiz, yanvar oyi boshida Turizmni rivojlantirish davlat qo‘mitasi Buxoro, Samarqand, Xorazm va Qashqadaryo viloyatlari IIB qoshida xavfsiz turizmni ta’minlash bo‘yicha boshqarmalari tuzilgani haqida xabar bergan edi. Ushbu boshqarmalar boshliqlari viloyat IIB boshliq o‘rinbosarlari hisoblanib, u yerda xorijiy tillarni biluvchi xodimlar faoliyat yuritishi aytilgandi.