TOShKENT, 18 yanv — Sputnik. Terrorizmda ayblanayotgan Sayfullo Soipovning advokatlari odil sudlovga bitimni taklif qilishmoqda, unga ko‘ra sudlanuvchi o‘lim jazosidan xalos etilishi mumkin, deyilgan sud hujjatlarida.
Ayblovchi tomon o‘lim jazosini so‘rash borasida aniq bir fikrga kelgani yo‘q, bu borada Bosh prokuror Jeff Seshnsning qarori kutilmoqda, deb xabar qiladi RIA Novosti.
Eslatib o‘tamiz, 31-oktabr kuni Manxettenda yuk mashinasida bir necha kishining hayotiga zomin bo‘lgan Sayfullo Soipovga terrorizm va qotillik bo‘yicha ayblov e’lon qilindi.
Soipovga umumiy hisobda 8 ta qotillik (hujum qurbonlari soni bo‘yicha), 12 ta qotillik sodir etishga urinish (jabrlanganlar soni bo‘yicha), ID terrorchilik guruhiga ko‘mak berish va ko‘mak berishga urinish, zo‘ravonlik va transport vositasiga zarar yetkazish bandlari bo‘yicha ayblov qo‘yilgan edi.
Adliya vazirligi xabarida qayd etilishicha, Soipov yuk mashinasida hujum qilishga uni telefon orqali ko‘rgan ID videosi ilhom berganini tan olgan. U jinoyatni sodir etishni bir yil avval o‘ylab qo‘ygan, hujumdan ikki oy avval esa "ko‘proq begunoh odamlar jabrlanishi" uchun uni yuk mashinasi yordamida amalga oshirishga qaror qilgan. U teraktdan bir haftacha oldin yuk mashinasini ijaraga olib, uni boshqarishni mashq qila boshlagan.
Soipov yuk mashinasida Manxettenning janubi-g‘arbida joylashgan velosipedchilar yo‘lagida uchragan velosipedchilarni bosib, bir necha ko‘cha yurib o‘tgan, so‘ngra maktab avtobusiga urilib to‘xtagan.
Hujum oqibatida 8 kishi halok bo‘lgan, 12 kishi jarohat olgan.