TIV o‘zbekistonliklarni Isroil va Eron mojarolariga nisbatan vazmin bo‘lishga chaqirdi
15:53 17.06.2025 (yangilandi: 15:57 17.06.2025)
© Sputnik / Pavel Lisisin
Obuna bo‘lish
TIV: O‘zbekiston fuqarolarini tinchlikparvarlik, bag‘rikenglik va mas’uliyatli fuqarolik pozitsiyasini saqlashga chaqirib qolamiz.
TOShKENT, 17-iyun — Sputnik. O‘zbekiston Tashqi ishlar vazirligi fuqarolardan Isroil va Eron mojarolariga nisbatan diniy, irqiy yoki boshqa shaxsiy mansubliklar asosida munosabat bildirmaslikni so‘radi.
Qayd etilishicha, so‘nggi kunlarda Isroil va Eron o‘rtasidagi keskinlik yanada kuchayib, qurolli to‘qnashuvlarga aylandi. Bu nafaqat mintaqada, balki butun dunyo hamjamiyatida jiddiy xavotir uyg‘otmoqda.
Mojaroning avj olishi butun mintaqa barqarorligi va tinchligiga tahdid solayotgani shubhasiz. Bu jarayonlar, avvalo, oddiy fuqarolar – tinch aholi, ayniqsa bolalar va ayollar uchun og‘ir oqibatlarga olib kelmoqda.
“O‘zbekiston Respublikasi urushni muammolarni hal etish vositasi deb emas, balki inson hayoti, barqarorlik va taraqqiyotga jiddiy xavf soluvchi holat sifatida baholaydi. Urushda g‘olib bo‘lmaydi. Eng katta yo‘qotishni doim oddiy insonlar tortgan va bugun ham shunday bo‘lmoqda”, — deyiladi vazirlik e’lon qilgan xabarda.
Qayd etilishicha, O‘zbekiston har doim tinchlikparvar siyosat yuritib kelgan va shunday davom etadi. Mamlakat barcha davlatlar bilan do‘stona va o‘zaro manfaatli hamkorlik munosabatlarini rivojlantirib kelmoqda.
“Shu munosabat bilan, O‘zbekiston fuqarolarini tinchlikparvarlik, bag‘rikenglik va mas’uliyatli fuqarolik pozitsiyasini saqlashga chaqirib qolamiz. Mojarolarga nisbatan diniy, irqiy yoki boshqa shaxsiy mansubliklar asosida munosabat bildirmaslik, har qanday nafrat va ziddiyat targ‘ibiga qarshi turish barchamizning umumiy burchimizdir”, — deya qayd etilgan xabarda.
Shuningdek, fuqarolar turli provokatsiya va haqoratomuz chaqiriqlarga uchmaslikka, holatlarga nisbatan hissiyot emas, balki vazmin munosabatni saqlab qolishga da’vat etilgan.
“Jamiyatimizda milliy va diniy totuvlikni saqlash – umumiy barqarorlik va xavfsizlikning muhim kafolati ekanligini eslatamiz. O‘zbekiston Respublikasi Tashqi ishlar vazirligi barcha mojarolar xalqaro huquq normalari va diplomatik muloqot asosida tinch yo‘l bilan hal etilishi tarafdori ekanini yana bir bor ta’kidlaydi. Tinchlik va o‘zaro hurmat asosidagi munosabatlar har doim yurtimiz tashqi siyosatining ustuvor yo‘nalishi bo‘lib qoladi”, — deya xulosa qilingan xabarda.
