Putin va Erdog‘an qanday mavzularni muhokama qilishdi?

Tomonlar Rossiya-Turkiya hamkorligini yanada rivojlantirishning dolzarb masalalari ko‘rib chiqishdi, munosabatlarning ijobiy dinamikasi va o‘zaro tovar ayirboshlash hajmining o‘sishi mamnuniyat bilan qayd etildi.

Rossiya prezidenti AQSh bilan munosabatlarning tiklanishi, oliy va boshqa darajadagi aloqalarning konstruktiv xarakteri haqida ma’lum qildi. Ikki davlat ekspert guruhlari o‘rtasida yaqinda Ar-Riyodda o‘tkazilgan maslahatlashuvlar natijalari hamda 18-martdan boshlab Rossiya va Ukrainadagi energetika obyektlariga 30 kun muddatga zarba berishga moratoriy joriy etish bo‘yicha erishilgan kelishuvlar muhokama qilindi.

Vladimir Putin kelishuvlarga qaramasdan, Kiyev rejimining Rossiya energetika infratuzilmasiga hujum qilish bo‘yicha davom etayotgan provokatsion urinishlariga e’tibor qaratdi.

Turkiya va BMT Kotibiyati vositachiligida dastlab 2022-yil iyul oyida tuzilgan, biroq amalda amalga oshirilmagan, xavfsiz yuk tashish bo‘yicha “Qora dengiz tashabbusi”ni qayta tiklash va Rossiya oziq-ovqat va o‘g‘itlarini eksport qilish yo‘lidagi to‘siqlarni bartaraf etish yuzasidan fikr almashildi.

Erdog‘an Rossiya-Amerika muloqotini qo‘llab-quvvatlashini va Turkiya tomoni “Qora dengiz kelishuvi”ni ilgari surishga ko‘maklashishga tayyorligini bildirdi.

Suriyadagi vaziyatni muhokama qilar ekan, davlat rahbarlari mamlakat birligi, suvereniteti va hududiy yaxlitligini ta’minlash, ichki siyosiy barqarorlikni mustahkamlash, aholining barcha etnik va diniy guruhlari qonuniy huquq va manfaatlarini hurmat qilish uchun uning hokimiyati va xalqiga har tomonlama yordam ko‘rsatish zarurligini ta’kidladilar.

Putin Erdog‘an va butun turk xalqini musulmonlar uchun muqaddas Ramazon oyi va yaqinlashib kelayotgan Ramazon hayiti bilan tabrikladi.