O‘zbekiston davlat sport akademiyasi tashkil etiladi — tafsilotlar
Obuna bo‘lish
Akademiyada o‘quv jarayoni 2025/2026 o‘quv yilidan boshlanadi.
TOShKENT, 29-may — Sputnik. O‘zbekiston davlat sport akademiyasi tashkil etiladi, bitiruvchilar davlat namunasida diplom oladi. Bu haqda prezidentning tegishli qarori qabul qilindi.
Hujjatga ko‘ra, Oliy sport mahorati instituti negizida O‘zbekiston davlat sport akademiyasi tashkil etiladi.
Quyidagilar 2025/2026 o‘quv yilidan akademiya huzuriga o‘tkaziladi:
Jismoniy tarbiya va sport ilmiy tadqiqotlar instituti;
Jismoniy tarbiya va sport bo‘yicha mutaxassislarni qayta tayyorlash va malakasini oshirish instituti hamda uning tegishli filiallari.
“Sport sohasida natijalari yuqori bo‘lgan davlatlarning yetakchi oliy sport-ta’lim tashkilotlari tajribasi asosida zamonaviy kadrlarni tayyorlash akademiyaning asosiy vazifalaridan biri etib belgilandi”, — deyilgan hujjat matnida.
Akademiya tizimida davlat muassasasi shaklidagi Davlat sport tibbiyoti ilmiy-amaliy markazi tashkil etiladi.
Davlat sport tibbiyoti ilmiy-amaliy markazi sport tibbiyoti sohasida yagona davlat siyosatini amalga oshiruvchi, sport turlari bo‘yicha O‘zbekiston milliy terma jamoalari a’zolarini tibbiy jihatdan musobaqalarga tayyorlashni tashkil qiluvchi davlat tibbiyot muassasasi hisoblanadi.
Sportchilarga xorijiy tillar va O‘zbekiston tarixini chuqurlashtirilgan holda o‘rgatish maqsadida Akademiya tuzilmasida Axborot-kutubxona markazini o‘z ichiga oluvchi yuridik shaxs maqomiga ega bo‘lmagan O‘zbekiston tarixi va xorijiy tillarni o‘qitish markazi tashkil etiladi.
“Akademiyada o‘quv jarayoni 2025/2026 o‘quv yilidan boshlanadi. Akademiya bitiruvchilariga davlat namunasidagi diplom beriladi”, — deyilgan hujjatda.
Akademiyaga talabalarni qabul qilish parametrlari Respublika oliy ta’lim muassasalariga o‘qishga qabul qilishning davlat buyurtmasi doirasida belgilanadi.
Akademiya talabalarining kontingenti quyidagilarga qarab shakllantiriladi:
olimpiya va paralimpiya sport turlariga tayyorlash markazlarida rivojlantirilayotgan sport turlari bo‘yicha so‘nggi bir yilda Jahon, Osiyo va O‘zbekiston chempionatlarida g‘olib va sovrindor bo‘lgan olimpiya va paralimpiya kollejlari, shuningdek, umumiy o‘rta, o‘rta maxsus va professional ta’lim muassasalarining bitiruvchilari orasidan ularning sport natijalariga qarab, saralash (seleksiya) asosida.
"Bunda, Olimpiya va paralimpiya kollejlaridan saralab olingan bitiruvchilar akademiyaga to‘g‘ridan-to‘g‘ri ikkinchi bosqichga qabul qilinadi", — deya keltirilgan hujjatda.
Akademiya talabalari sport va ommaviy jismoniy tarbiya tadbirlarining kalendar rejasiga muvofiq o‘tkaziladigan respublika musobaqalarida to‘g‘ridan-to‘g‘ri ishtirok etadi.
Akademiya bitiruvchilariga trenerlik faoliyati bilan shug‘ullanish uchun malaka sertifikati, istisno tariqasida, to‘g‘ridan-to‘g‘ri 6-yilga beriladi.
