TOShKENT, 20 dek — Sputnik. Qozog‘iston prezidenti Qasim-Jomart Toqayev 20-dekabr kuni yangi korrupsiyaga qarshi kurashish qonunini imzoladi. Bu haqda Oqo‘rda matbuot xizmati xabar qilmoqda.
Hujjat bilan poraxo‘rlik bilan bog‘liq og‘ir va o‘ta og‘ir jinoyat sodir etgan mahkumlarni shartli ravishda muddatidan ilgari ozod qilish taqiqlanmoqda. Shuningdek, qonun bilan endilikda davlat xizmatchilari, parlament deputatlari va sudyalarga xorijiy banklarda hisob raqamga ega bo‘lish taqiqlandi, deya yozadi Sputnik Qozog‘iston agentligi.
Qonun Qasim-Jomart Toqayev topshirig‘iga binoan tayyorlangan va parlamentning quyi va yuqori palatasi tomonidan ma’qullangan edi.
Eslatib o‘tamiz, avvalroq Qozog‘istonda davlat xizmatchisi va uning oila a’zolariga sovg‘a, moddiy mukofot berish hamda xizmatlar ko‘rsatish to‘liq taqiqlangani xabar qilingan edi.
