TOShKENT, 9 noya — Sputnik. Maktabgacha ta’lim vaziri Agrippina Shin va Xitoyning O‘zbekistondagi elchisi Szan Yan o‘rtasida onlayn uchrashuv bo‘lib o‘tdi.
Vazirlik matbuot xizmati xabariga ko‘ra, uchrashuv davomida kelajakdagi hamkorlikning dolzarb masalalari muhokama qilindi.
Xususan, O‘zbekiston hududida o‘yinchoqlar va turli xil o‘yin uskunalarini hamda didaktik materiallarni ishlab chiqarishni yo‘lga qo‘yish maqsadida investitsiyalarni jalb etish, shuningdek, davlat-xususiy sherikligi asosida nodavlat maktabgacha ta’lim tashkilotlarini tashkil etish taklifi ilgari surildi.
Shu bilan birga, davlat maktabgacha ta’lim tashkilotlarida xitoy tilini qo‘shimcha chet tili sifatida o‘rganish, bu borada xodimlar malakasini oshirish kabi masalalar ham muhokama qilindi.
Bundan tashqari, hamkorlikda Toshkent shahrida raqamli bolalar bog‘chasining pilot loyihasini ishga tushirish muhokama qilindi.
Shuningdek, Xitoyning Sun Sinlin jamg‘armasi hamkorligi doirasida ixtisoslashtirilgan MTTlarning ta’lim sifatini oshirish, xodimlarning bilim salohiyatlarini kengaytirish masalalari borasida fikr almashildi.
