TOShKENT, 28 okt — Sputnik. O‘zbekiston va Turkiya o‘rtasida harbiy va harbiy-texnik hamkorlikni rivojlantirish to‘g‘risida bitim imzolandi.
Bitimni mamlakatga tashrif buyurgan Turkiya mudofaa vaziri general Hulusi Akar va O‘zbekiston mudofaa vaziri general-mayor Bahodir Qurbonov imzoladi.
Muzokara davomida mudofaa vazirlari davlat rahbarlarining O‘zbekistonga va Turkiyaga amaliy tashriflari davomida erishilgan natijalarga, shuningdek, harbiy sohada ikki tomonlama hamkorlikning bugungi holati, istiqboliga ham alohida e’tibor qaratishdi.
“Muzokaralardan so‘ng ikki davlat Mudofaa vazirligi rahbarlari O‘zbekiston hamda Turkiya o‘rtasida harbiy va harbiy-texnik hamkorlikni rivojlantirish to‘g‘risidagi bitimni imzoladilar”, - deyilgan O‘zbekiston Mudofaa vazirligi matbuot xizmati xabarida.
Eslatib o‘tamiz, avvalroq Shavkat Mirziyoyev Turkiya milliy mudofaa vaziri, armiya generali Hulusi Akarni qabul qilgani xabar qilingan edi.
