TOShKENT, 22 avg - Sputnik. Buxoro viloyati hokimi vazifasini bajaruvchi Karim Kamalov 66 yoshida olamdan o‘tdi, deb xabar bermoqda O‘zA.
"Bugun, davlat va jamoat arbobi, Buxoro viloyati hokimi v.b. Kamalov Karim Djamalovich 66 yoshida vafot etdi", - deyilgan xabarda.
Ilgariroq ijtimoiy tarmoqlarda Kamalov vafot etgani haqida gap-so‘zlar tarqalgan, ammo 17-avgust kuni Buxoro viloyati hokimligi matbuot-xizmati ushbu xabarlar haqiqatga mos emasligi haqida bayonot bilan chiqqan edi.
Eslatib o‘tamiz, 30-iyul kuni AOKAda o‘tkazilgan brifingda Buxoro viloyati hokimi vazifasini bajaruvchi Karim Kamalovda ham yangi turdagi COVID-19 koronavirus infeksiyasi aniqlangani, u hozirda Toshkentda davolanayotgani haqida xabar berilgan edi.
Karim Kamalov 1954-yilda tavallud topgan, Buxoro muhandislik-texnologiya institutini tamomlagan. "Do‘stlik" va "Mehnat shuhrati" ordenlari sohibi.
Kamalov 2017-yildan 2020-yilning fevraliga qadar Buxoro shahri hokimi sifatida ishlagan, fevral oyidan esa Bosh vazir o‘rinbosari lavozimiga tayinlangan O‘ktam Barnoyev o‘rniga Buxoro hokimi vazifasini bajaruvchi etib tayinlangan edi.
