TOShKENT, 19 avg - Sputnik. O‘zbekiston Monopoliyaga qarshi kurashish qo‘mitasi tomonidan “UzAuto Motors” AJda o‘tkazilgan tekshiruv natijasida "Raqobat to‘g‘risidagi" qonunni buzish holati aniqlandi.
Qo‘mita maxsus komissiyasining tekshiruvi natijasida kompaniya ishlab chiqarilayotgan avtomobillar narxlarini 10,29 % asosssiz ravishda oshirgani ma’lum bo‘lgan.
Xususan, 2020-yil mart oyida kompaniya avtomobil narxlarini shakllantirishda, xom-ashyo va materiallar, yoqilg‘i, energetika va mehnat resurslari uchun haqiqatda amalga oshirilmagan xarajatlarni kiritgan.
Vaziyatni batafsil o‘rgangan Maxsus komissiya, 19-avgust kuni “UzAuto Motors ” AJga quyidagi majburiy ko‘rsatmalarni bajarishni buyurdi:
- “Spark” avtomobillari narxini 3 - 3,5 mln. so‘mga;
- “Nexia 3” avtomobillari narxini 3,1 -3,7 mln. so‘mga;
- “Cobalt” avtomobillari narxini 4,4 - 10,5 mln. so‘mga;
- “Gentra” avtomobillari narxini 13,8 -19,8 mln. so‘mga;
- "Labo" va “Damas” avtomobillari narxini 13 - 15,7 mln. so‘mga kamaytirish.
Undan tashqari, Maxsus komissiya ushbu yilning mart oyidan buyon avtomobil xarid qilgan mijozlarga xarid qilingan avtomobillar narxida yuqorida ko‘rsatilgan mablag‘larni qaytarishga ko‘rsatma berdi.
