TOShKENT, 22-iyul - Sputnik. Britaniya bosh vaziri Boris Djonson chet el aralashuviga qarshi kurash uchun maxsus xizmatlarga ko‘proq vakolatlar taqdim etishga tayyor, deb xabar qilmoqda Times nashri.
Hukumat mamlakatda "dushmanlar faoliyatiga" to‘sqinlik qiluvchi yangi qonunlarni ishlab chiqishni rejalashtirmoqda. Yangi qonunlarga muvofiq, AQSh va Avstraliyadagi yondashuvlar namunasi asosida rasmiy "chet el agentlari reyestri" tashkil etilishi mumkin, deya ta’kidlaydi nashr. O‘z faoliyati haqida xabar bermaydiganlar deportatsiya qilinishi yoki qamoqqa olinishi mumkin.
Chet el agentlarini ro‘yxatga olish to‘g‘risidagi qonun (FARA) AQShda 1938-yildan buyon amal qilib keladi. Ushbu qonun normalariga muvofiq, chet el agenti sifatida ro‘yxatga olingan kompaniyalar yoki shaxslar o‘z faoliyati, shu jumladan, moliyaviy holati haqidagi ma’lumotlarni amerika hukumatiga oshkor qilishi lozim.
Seshanba kuni britan parlamentining razvedka bo‘yicha qo‘mitasi RFning Britaniya siyosatiga aralashuvi haqida dokladni e’lon qildi. Rossiya ko‘p marotaba turli davlatlardagi demokratik jarayonlarga ta’sir ko‘rsatishga urinish bo‘yicha ayblovlarni rad etib kelgan. Rossiya prezidenti matbuot-kotibi Dmitriy Peskov esa bu ayblovlarni "mutlaqo asossiz", deb atagan. RF TIV rahbari Sergey Lavrov, turli davlatlardagi saylovlarda Rossiyaning qo‘li borligi haqidagi ta’kidlar haqida gapirar ekan, buni tasdiqlovchi birorta fakt yo‘qligini ma’lum qilgan.
