TOShKENT, 7-iyul — Sputnik. Turkiya harbiylari Anqara yaqinidagi Murted aviabazasida S-400 zenit raketa majmualarini amerikaning F-16 va F-4 qiruvchilariga qarshi yangitdan sinovdan o‘tkazishga kirishdilar. Bu haqda Fighter Jets World xabar bermoqda.
Portal ma’lumotlariga ko‘ra, test jarayoni 4-iyul kuni boshlangan va 26-noyabrga qadar davom etadi.
Xabarda aytilishicha, Turkiya AQShning "modomiki sinovlar o‘tkazilishi boshlansa, sanksiyalar kiritilishi ehtimoli" haqidagi ogohlantirishlarini e’tiborsiz qoldirgan.
Fighter Jets World provinsiya rahbariyati xabaridan iqtiboslar keltirgan, ularda aytilishicha, qiruvchilar katta va kichik balandliklarda uchadi.
O‘tgan yilning kuzida turk harbiylari Anqara ustida turli balandliklarda uchgan amerika qiruvchilariga qarshi turk poytaxti ustidagi osmonni nazorat qilib turgan S-400ni sinovdan o‘tkazgan edilar.
Rossiya S-400 ZRK xaridi Anqara va Vashington o‘rtasidagi munosabatlarda inqirozni yuzaga keltirdi. Tizimlarni yetkazib berish ishlari o‘tgan yoz mavsumida boshlangan, ammo amerika hukumati turk sheriklardan bitimdan voz kechish va Patriot majmualarini xarid qilishni talab qilgan edi. AQSh, agar Turkiya bu talabni rad etadigan bo‘lsa, Anqaraga F-35 qiruvchilarini sotishni kechiktirish va hatto bekor qilish hamda sanksiya kiritishini ma’lum qilgan edi. Turkiya bu po‘pisalardan so‘ng ham yon bosishdan bosh tortdi.
Rossiya Turkiyaga jami summasi 2,5 milliard dollarga teng to‘rtta S-400 divizionini yetkazib berish bo‘yicha birinchi kelishuvni bajardi. Keyinchalik tomonlar ikkinchi partiya bo‘yicha bitimga erishdilar.
