TOShKENT, 28 apr — Sputnik. O‘zbekistonda bir kunda 66 nafar bemor koronavirusdan tuzalib ketdi. Ular orasida 72 yoshli fuqaro va uch nafar chaqaloq ham bor. Bu haqda Sog‘liqni saqlash vazirligi xabar qildi.
Dastlab Farg‘ona viloyatida 7 nafar, Qashqadaryo viloyatida esa 1 nafar koronavirus infeksiyasiga chalingan bemor tuzalib ketdi.
Farg‘onada sog‘ayganlarning 5 nafari Turkiyadan kelgan. Qolgan 2 nafari esa bemor bilan muloqot orqali kasallikni yuqtirib olgan. Eng kattasi 48 yoshda, eng kichigi 2020-yil tug‘ilgan.
Bugun Buxoro viloyatida koronavirusga chalingan navbatdagi 9 nafar bemor to‘liq sog‘aydi. Shifo topganlarning barchasi joriy yil 25-mart kuni Rossiyadan charter reys bilan Buxoroga olib kelingan va karantinga olingan. Ular orasida eng yoshi kattasi 55 yoshda bo‘lsa, eng yoshi kichigi 19 yosh.
Poytaxtdagi Virusologiya ilmiy-tekshirish instituti klinikasida 21 nafar, Epidemiologiya, mikrobiologiya va yuqumli kasalliklar ilmiy-tekshirish instituti klinikasidan 4 nafar, jami 25 bemor butkul sog‘aydi.
Epidemiologiya, mikrobiologiya va yuqumli kasalliklar ilmiy-tekshirish instituti klinikasida sog‘ayganlarning biri 72 yoshda bo‘lgan. U 30-mart kuni juda og‘ir ahvolda mazkur klinikaga olib kelingan. Uzoq vaqt sun’iy nafas olish apparatida bo‘lgan bemor shifokorlarning samarali davolash muolajalaridan keyin infeksiyadan to‘liq tuzalgan bo‘lsa-da, boshqa hamroh kasalligi borligi sababli ixtisoslashgan shifoxonaga reabilitatsiya uchun o‘tkazildi.
Shuningdek, Toshkent tibbiyot akademiyasi ko‘p tarmoqli klinikasida ham bir yo‘la 24 nafar bemor butkul sog‘aydi. Ular orasida 11 oylik va 1 yoshli chaqaloqlar ham bor.
Shu tariqa, mamlakat bo‘ylab koronavirus infeksiyasidan butkul sog‘ayganlar 958 nafarga yetdi. Kasallanganlarning umumiy soni 1939 kishini tashkil etadi. 8 kishi vafot etgan.
