TOShKENT, 5 apr — Sputnik. AQShda O‘zbekiston fuqarolari orasida COVID-19 koronavirus infeksiyasidan ilk o‘lim holatlari qayd etildi. Bu haqda mamlakatning Vashingtondagi elchisixonasi matbuot xizmati xabar qilmoqda.
Xabarda yozilishicha, vafot etganlardan biri 51 yoshli erkak kishi, ikkinchisi esa 69 yoshdagi ayol kishidir. Ularning har ikkisi ham Nyu-York shahrida istiqomat qilgan.
O‘zbekistonning AQShdagi diplomatik muassasasi fuqarolarning qarindoshlari va yaqinlariga chuqur hamdardlik bildirgan.
Shuningdek, Amerika Qo‘shma Shtatlari va Kanadadagi hamda Amerika qit’asining boshqa mamlakatlaridagi barcha fuqarolardan barcha xavfsizlik choralariga rioya qilish, mahalliy hokimiyat va shifokorlarning tavsiyalariga qat’iy rioya etish hamda uyda qolish so‘ralgan.
Ta’kidlanishicha, O‘zbekistonning Vashingtondagi elchixonasi va Nyu-Yorkdagi bosh konsulligi tunu kun ishlamoqda. Barcha masalalar bo‘yicha (202) 887-5300 (ext. 1) (elchixona) va (212) 754-7403, (212) 754-6178 (bosh konsulxona) raqamlariga murojaat qilish mumkin.
So‘nggi ma’lumotlarga ko‘ra, AQSh koronavirus bemorlari bo‘yicha yetakchi bo‘lib qolmoqda, u yerda kasallanganlar soni 312 ming kishidan oshgan. 8503 kishi vafot etgan.
